Os candidatos animan a votar
Os cidadáns elixen 350 deputados e 208 senadores; 23 no Congreso e 16 no Senado. por Galicia. No país presentáronse 35 listas, sete menos que o 20 de decembro pasado. Os principais candidatos a nivel estatal e galego xa votaron.
Por Galicia Confidencial | Santiago | 26/06/2016 | Actualizada ás 13:37
A número dous da candidatura de En Marea ao Congreso pola Coruña, Yolanda Díaz, animou á cidadanía para votar "co corazón" para poder "cambiar as cousas de base" tras as eleccións xerais deste domingo.
"O tempo é histórico, votade co corazón e sabendo que temos que ser corresponsables na historia, se vós queredes é posible gañar aos que gobernan sen presentarse ás eleccións, aos mercados", manifestou a tamén líder de Esquerda Unida.
Yolanda Díaz acudiu ás 12,00 horas deste domingo para votar ao Instituto de Canido, en Ferrol, onde asegurou que España e Galicia viven "un momento histórico".
BNG
O número un da lista do BNG-Nós ao Congreso pola provincia de Pontevedra, Luis Bará, confiou en "ter representación" ante a "nova oportunidade" que supón a repetición das eleccións xerais tras a convocatoria do pasado mes de decembro.
"Esperemos que non haxa unha terceira convocatoria e que sexa un resultado positivo nestas eleccións para o nacionalismo galego", sinalou o candidato.
Bará, que foi o máis madrugador dos primeiros candidatos provinciais, exerceu o seu dereito ao voto ás 9,45 horas no IES Frei Martín Sarmiento de Pontevedra, acompañado polo alcalde de Pontevedra, Miguel Anxo Fernández Lores, e a edil de Educación, Igualdade e Servizos Sociais, Carme Fouces.
Luis Bará confiou na "alta participación" dunha xornada marcada polo bo tempo, que sexa unha "xornada tranquila e que Galicia teña unha presenza que defenda os seus intereses en Madrid", engadiu.
PSdeG
O candidato socialista á Presidencia da Xunta, Xoaquín Fernández Leiceaga, animou os cidadáns a votar "de forma masiva" nas eleccións xerais que se celebran este domingo.
Tras depositar o seu voto nas instalacións do reitorado da Universidade de Santiago de Compostela (USC) ás 11,00 horas, Leiceaga recordou que se trata "do día grande da democracia", e que os verdadeiros protagonistas son os cidadáns.
Por ese motivo, o aspirante socialista ao Goberno galego animou a que exerzan o seu dereito a voto para reforzar as institucións e que o fagan de nun ambiente "tranquilo e estable".
Ciudadanos
O cabeza de lista de Ciudadanos pola provincia da Coruña, José Canedo, animou aos coruñeses a votar "con cabeza" ao longo desta xornada electoral e espera que non haxa que volver pronto" ás urnas.
O candidato de Cidadáns ao Congreso foi madrugador e votou puntual, ás 10,00 horas deste 26-J, nun colexio electoral do ensanche compostelano.
Tras depositar o seu voto, Canedo asegurou que está na man dos coruñeses "a decisión de que todo mellore", nun día que espera "tranquilo" e que "apetece nin moi quente nin moi frío".
