Por Galicia Confidencial | A Coruña | 26/06/2016 | Actualizada ás 14:08
O presidente dunha mesa electoral situada nun colexio de Os Tileiros, en Santiago de Compostela, foi evacuado ao hospital tras sufrir unha emerxencia médica mentres exercía a súa responsabilidade.
Segundo explicaron a Europa Press fontes da Delegación do Goberno, malia esta incidencia, a actividade continuou desenvolvéndose con "normalidade" dado que os dous vogais presentes continuaron coas funcións.
Atraso na Coruña
A Xunta Electoral autorizou que o colexio Fernández Latorre da Coruña abra ata as 20,30 horas tras arrancar con atraso, segundo confirmaron a Europa Press fontes da Delegación do Goberno.
En concreto, este centro atópase situado na zona de Catro Camiños e o motivo do atraso na súa apertura foi a falta dun vogal.
Con todo, o delegado do Goberno en Galicia, Santiago Villanueva, destacou que a xornada electoral transcorre con "normalidade" en Galicia, coas 3.981 mesas habilitadas nos 2.470 locais abertos.
Horarios dos resultados e enquisas
A vicepresidenta do goberno ten previsto dar unha rolda de prensa en Madrid ao redor das 22:30 horas. Con todo, debido ao apretado do resultado en moitas provincias, é probábel que Soralla Sáez de Santamaría compareza algo máis tarde, cara as 23 horas.
Radio Televisión Española (RTVE) e as televisións autonómicas ofrecerán a partir das 20.00 horas deste domingo 26 de xuño unha sondaxe elaborada pola empresa Sigma Dos para a Federación de Organismos de Radio e Televisión Autonómicos (FORTA), na que está a TVG, e RTVE.
Segundo indicaron a Europa Press fontes da Corporación RTVE, a sondaxe electoral realizarase a pé de urna mediante 132.000 entrevistas a electores realizadas nun total de 1.100 colexios electorais e 2.720 mesas, que pecharán ás 20.00 horas a xornada das votacións.
Pola súa banda, na cadea COPE, o presidente de GAD3, Narciso Michavila ofrecerá a partir das 20.00 horas os resultados desta empresa encuestadora para a emisora e para ABC.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.