O cambio de tendencia no voto urbano perfila unhas autonómicas axustadas
En Marea deixa case 30.000 votos nas sete grandes cidades, mentres que o PP recupera 12.000 papeletas. Tamén sobe o PSdeG e baixan Ciudadanos e o BNG. A estrapolación dos resultados deixaría ao PP gobernando, pero co apoio de C's.
Por Xurxo Salgado | Compostela | 27/06/2016 | Actualizada ás 14:00
O 26X deixa un panorama aberto para todos os partidos de cara ás vindeiras autonómicas e será nos ámbitos urbanos e semiurbanos onde se libre unha intensa batalla que pode, ou non, cambiar o actual presidente da Xunta.
Estes comicios deixan patente un cambio de tendencia que se viu favorecida por unha abstención que beneficiou, principalmente, aos populares. Ao PPdeG foi en masa un voto útil que chegou, sobre todo, dos ámbitos urbanos, grazas aos desencantados de Ciudadanos. Un voto urbano que tamén castigou, e moito, a En Marea.
A coalición de base municipalista colleitaba hai seis meses os seus mellores resultados nas cidades e nos entornos metropolitanos, un apoio que agora perde de xeito pronunciado, deixando unha media de 4 puntos nas principais urbes galegas. Situación ben diferente a do PSdeG, o gran prexudicada en decembro que, a pesar de non aumentar en votos nestes comicios, si o fixo en porcentaxe de voto e en apoio urbano.
De feito, o PP volveu ser o partido máis semellante ao de Fraga que ao de Feijóo. Gañou en 300 concellos dos 314, en 16 localidades máis que hai seis meses. O PSdeG-PSOE fíxoo en 12, cinco menos e En Marea en só dúas das 14 nas que gañou en decembro. Tampouco o BNG mantivo a única localidade na que gañou o 26D.
Pero a pesar da gran suba do PP nas provincias do interior, o certo é que a súa vitoria consolidouse nas cidades ao beneficiarse da gran baixada de Ciudadanos e da coalición de Podemos, Anova e Esquerda Unida. Na Coruña, os primeiros deixaron 30.000 votos e os segundos, 7.000, mentres que o PP recuperaba 15.000 papeletas.
Na provincia de Pontevedra, En Marea perdeu 25.000 votos e o PP recuperou 8.000. En Lugo, En Marea deixou 7.000 votos, fronte aos case 4.000 que recuperou o PP e en Ourense, os populares subiron case 6.000, os mesmos que perdeu En Marea, o que provocou que o seu candidato, elixido en decembro, quedara fóra por 1.600 votos.
En Marea baixa en todas as cidades
A maior parte desa baixada de En Marea estivo nas cidades e nas contornas metropolitanas. Así, esta coalición perdeu votos nas sete grandes cidades galegas e deixa de ser primeira forza en Vigo, por detrás do PP e perdendo 9.000 votos con respecto a decembro.
Unha situación ben diferente é a do PP, que sobe en todas elas, e a do PSdeG que tamén recupera posicións, aínda que só se mantén por riba de En Marea nas cidades de Lugo e Ourense. Así, en Vigo, os populares suman uns 3.000 sufraxios máis e alcanza máis do 31% dos apoios, fronte a o case 28% de decembro. O PSOE, nesta cidade gobernada polo socialista Abel Caballera cunha ampla maioría, recupera un millar máis de votos con respecto aos anteriores comicios de carácter estatal. Tamén perden papeletas ao seu favor Ciudadanos e BNG.
Na Coruña, onde o alcalde é Xulio Ferreiro, da Marea Atlántica, En Marea cae nuns 8.000 votos, ata o 26,41% dos apoios, fronte ao 31% de finais do pasado ano. O PP sobe en máis de 3.000, o PSOE tamén crece (nuns 2.000 sufraxios) e perden respaldos Cidadáns e BNG.
Mentres, en Ferrol, onde Ferrol en Común goberna co PSOE, En Marea perde uns 1.500 votos en relación ao 20 de decembro, o PP sobe nun millar e o PSOE tamén repunta, en algo menos de 1.000 apoios.
Na capital galega, gobernada por Martiño Noriega á fronte de Compostela Aberta, En Marea rexistra igualmente un descenso duns 3.000 votos, fronte ao ascenso do PP nuns 1.000 e do PSOE nunha cifra similar.
En canto a Pontevedra, que goberna o BNG, o Bloque sitúase tamén como quinta forza, por detrás do PP, que obtén uns 1.000 votos máis; de En Marea, que cae nuns 2.000; do PSOE, que practicamente se mantén, cun lixeiro ascenso; e de Ciudadanos, que logra menos apoios.
En Lugo, son uns 2.000 apoios máis os que recibe o PP, fronte a En Marea, que baixa en case 3.000. O PSOE, case sen variación, sobe nunhas poucas papeletas (en torno ao centenar) e Cidadáns, como o Bloque, cae.
No que respecta a Ourense, a perda de En Marea cífrase nuns 3.000 votos en comparación coa anterior convocatoria de eleccións xerais. Crece o PP en máis de 1.000 apoios, case se mantén sen variación o PSOE e Cidadáns e o BNG perden respaldos.
Extrapolación
Con todo, e a pesar da suba do PPdeG, o certo é que con estes resultados, Feijóo non revalidaría a maioría absoluta. A pesar de acadar o 42% dos votos, quedaría lonxe da maioría absoluta. Perdería seis actas, e tería que gobernar con Ciudadanos, que obtería seis escanos.
