Forte polémica sobre as feiras do libro de Galicia
Unha editorial acusa a Federación de Libreiros de censurala por ter criticado a un directivo da UPG ao fío da liorta co Concello de Santiago (Compostela Aberta). Os organizadores das feiras desmenten calquera censura, destacan o seu carácter “apolítico” e chaman a traballar en positivo.
Por Manuel Vilas | Santiago de Compostela | 29/06/2016 | Actualizada ás 13:50
Tras a lea sobre a feira en Santiago, as Feiras do Libro de Galicia volven a salpicarse de polémica. Agora, cun forte cruce dialéctico entre Urco Editora e os organizadores, a Federación de Libreiros de Galicia (FLG).
Urco publicou esta mañá un duro comunicado no que acusa á Federación de censurar a presentación dun libro seu na feira de Rianxo. A editorial tamén indica que lle cancelaron outras actividades paralelas.
Houbo censura?
En declaracións a GC, Pilar Rodríguez desmente que se cancelase ningunha presentación. “Nunca se censurou ningún libro”, insiste. Sobre as actividades, a presidenta dos libreiros asegura que “na Federación, como entidade sen ánimo de lucro, contratamos a quen queremos”.
Pola súa banda, Urco arremete contra a organización dos eventos mediante un modelo “caduco e decimonónico, opaco e caciquil”. Nas críticas ao modelo das feiras actuais coincide co Concello de Santiago. O goberno local de Compostela Aberta retiroulle a subvención á Feira de Santiago este ano esgrimindo a falta de apoio dos libreiros locais.
A liorta en Compostela
Voceiros da Federación responderon arrementendo contra a marea, feito que foi aproveitado pola oposición do PP para desgastar a Martiño Noriega. En palabras de Urco, “malia que o desangre das feiras da Federación leva a acontecer desde hai anos, algún membro da directiva non dubidou en botar as culpas de todos os males ante a prensa ao Concello de Santiago de Compostela”.
"Dende que Pilar Rodríguez é a presidenta non hai ningunha intencionalidade política nos actos da asociación, intencionalidade política cero", responde enfadada a presidenta dos libreiros. Rodríguez asegura que "a única pretensión que ten a federación é facer que os libreiros teñan menos problemas", chama aos editores e a todos a traballar en positivo e conclúe indicando que "un grao negro haino en calquera lugar".
Versións diferentes sobre a suposta expulsión do gremio estatal
No comunicado de URCO tamén se di que a Federación do país “non representa a ninguén” e de feito foi botada da federación no Estado. Rodríguez tamén rebate este punto, asegurando que seguen a ser membros. A directiva admite que houbo un “problema de tesorería” nas cotas que debía pagarlle a Confederación Española de Gremios y Asociaciones de Libreros pero indica que está solventado. A directiva argumenta que estas dificultades foron causadas, entre outros factores, porque a nova directiva atopouse cunha sentenza que lle recoñecía a unha ex-traballadora unha indemnización de 104.000 euros e que os libreiros deron prioridade ao pago da indemnización fixada pola Xustiza.
Fontes do sector confirmaron a GC que o ambiente en torno as feiras do libro leva enrarecido un tempo, con problemas como a falta de librarías locais nos eventos dalgunhas vilas e a liorta política en Compostela.
Acusacións de índole política
A “expulsión” de Urco de Rianxo débese, na súa opinión, a que un dos membros da editorial lanzou críticas no seu Facebook contra a organización durante a Feira do Libro de Santiago. En particular contra un directivo da Federación, libreiro de Compostela e militante da UPG (o principal partido do BNG) a quen acusa de facerlle o xogo ao PP. A FLG insiste no seu carácter “apolítico” e critica a Urco por “andar con esto” cando hai na súa opinión outros problemas moito máis importantes no mundo do libro. O post suposto motivo da polémica pódese ler nas imaxes desta noticia.
