Por Xurxo Salgado | Compostela | 30/06/2016 | Actualizada ás 14:49
As eleccións galegas serán en outono, o que xa non se sabe é se dun domingo de setembro, outubro, novembro ou decembro. O presidente galego, Alberto Núñez Feijóo, dixo que aínda é moi cedo para aventurar unha data porque, dixo, aínda non “se parou a valorala”.
“As eleccións galegas van ser cando estaban previstas e non hai nada que modificara a miña decisión inicial. Así que as galegas tocan cando tocan, que é no outono”, indicou na rolda de prensa posterior ao Consello da Xunta. Feijóo quixo deixar claro que unhas eleccións xerais non teñen nada que ver con unhas galegas e por iso felicitouse por non ter feito coincidir os dous comicios. “Acertamos”, dixo. “Creo que foi unha decisión responsable non utilizar unha situación débil da oposición, con problemas internos e deixala para outono”, engadiu para xustificarse.
Preguntado en varias ocasións sobre o posible mes desas autonómicas, o presidente galego respondeu sempre coa mesma fórmula; “o único claro é que será un domingo pero o mes aínda non o sei. Non teño unha opinión formada ao respecto”, insistiu aducindo que as eleccións xerais aínda estaban moi recentes.
Ademais tamén falou dunha posible coincidencia cos comicios vascos, tal e como xa aconteceu en dúas ocasións, pero deixou claro que, polo momento, non falou co lehandakari sobre esta cuestión. “Temos que repousar un pouco e logo xa notificaremos a data cando a teñamos tomada”, repetiu.
O xefe do Executivo galego tamén se referiu á posibilidade de que Xosé Manuel Beiras sexa o seu rival como candidato nas mareas. “Non sei cantas veces foi candidato á Xunta. Xa era cando eu era estudante de Dereito”, ironizou. E engadiu, “o único que sabe o candidato das mareas é Pablo Iglesias”, dixo. En todo caso, aclarou que a el non lle importan os seus rivais neses comicios, senón presentar “un proxecto de país”.
Por outra banda, Feijóo manifestou o seu desexo de deixar o presuposto galego do 2017 “preelaborado” e amosouse partidario de mandalo ao Parlamento galego cando se coñeza o teito de gasto de 2017. “Pero hai que ver se técnicamente é posible”, concluíu.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.