O CGAC inaugura tres mostras que "relén" o estado de excepción, o coleccionismo público e o mundo contemporáneo

O Centro Galego de Arte Contemporáneo (CGAC) inaugurará este xoves ás 20,00 horas tres exposicións de varios autores que "relén" e "contextualizan" o "perigo" dun estado de excepción permanente, o coleccionismo institucional e elementos e actitudes relacionados co home contemporáneo.

Así o indicou este xoves en Santiago o director da galería, Santiago Olmo, nunha rolda de prensa na que indicou que este proxecto, denominado 'Reler a colección', componse de tres exposicións que incorporan "diálogos con outras coleccións".

En concreto, as mostras son 'Estado de excepción', 'Louise Bourgeois. Cell', e 'Ensaio Visual' e permanecerán no museo ata o 2 de outubro. Ademais, no marco da exposición, o 12 de xullo ás 19,00 horas, o centro contará coa presenza do artista Anxo Calvo Ulloa e, o día 13 á mesma hora, con Misha Bies Golas, Jorge Varela e Manuel Figueiras.

En primeiro lugar, 'Estado de excepción' é unha lectura crítica sobre o momento actual, no que o terrorismo, os exilios, as emigracións e as guerras "ameazan" á sociedade "aberta" e "democrática".

LECTURAS A TRAVÉS DO CINEMA

Así, 'Estado de excepción' parte do filme 'Dial H-I-S-T-O-R-Y'' de Johan Grimonpez, e permite que Thomas Ruff aborde o impacto do 11 S; Thomas Locher o incumprimento dos dereitos humanos e Waalid Raad, Jaycer Salloum e Valentín Vallhonrat a guerra na zona Siria-Líbano.

Mentres, os artistas Xabier Ribas e Esko Mannikko céntranse na integración da inmigración e o impacto da emigración e Ana Teresa Ortega mostra a escritores e filósofos como os "protectores" da civilización.

Pola súa parte, a exposición 'Louise Bourgeois. Cell' aborda o coleccionismo público a través da compra realizada a finais dos 90 dunha obra de Louise Bourgeois polo Centro Andaluz de Arte Contemporánea. A compra, que supuxo un custo de 100 millóns de pesetas, xerou polémica na prensa sevillana e no medio artístico andaluz, pero posteriormente revalorizouse.

O director da galería explicou que a proposta de Burgeois "mantén o interese" malia o paso dos anos e formula "problemas" de "carácter teórico-plástico". Ademais, indicou que a súa obra "permite comprender a arte feminista" e como as mulleres "transformaron" a arte contemporánea nas décadas dos 90 e os 2000.

'ENSAIO VISUAL'

A mostra 'Ensaio visual' céntrase no filme 'Elexía dunha viaxe', de Alexandr Sokurov, mediante obras doutras coleccións públicas e privadas ou vinculadas co CGAC. A mostra inclúe un punto de encontro no que se exhibirán de modo continuo unha selección de vídeos.

A exposición componse de obras de Mona Hatoum, que reproduce a escala xigante ferramentas de cociña que, polo seu tamaño, parecen ameazadoras. Mentres, Liam Gillick examina os sistemas sociais, políticos e económicos actuais e José Pedro Croft xoga coa profundidade.

'Ensaio visual' tamén permite ver como Nacho Criado deforma a visión do home contemporáneo, Misha Bies Golas céntrase en Luis Seoane e a revista 'Galicia Emigrante e Manuel Eirís analiza o acovardamento das persoas.

COLABORACIÓN

O director do centro valorou a colaboración con outras galerías, como o Centro Andaluz de Arte Contemporánea, o Museo de Arte Contemporánea de Vigo (Marco), así como coa Fundación Luis Seone e a Fundación María José Jove de A Coruña e coleccionistas privados. Ademais, explicou que a colaboración con coleccionistas é cada vez máis común e que supoñen un "apoio importante" as galerías.

Por último, Santiago Olmo indicou que o presuposto do CGAC para a adquisición de obras durante o próximo ano se fixou en 100.000 euros.

Ademais, sinalou que este presuposto posibilitará comprar obras de alumnos do máster da Escola de Belas Artes de Pontevedra, así como adquirir un maior número de obras de cada artista e realizar un "seguimento" dos seus traballos.