Por Galicia Confidencial | Compostela | 06/07/2016 | Actualizada ás 09:30
Todo o sector audiovisual rexeita os despedimentos no Centro Galego das Artes da Imaxe (CGAI). A Asociación de Actores e Intérpretes (AISGE), a Asociación Galega de Produtoras Independentes (AGAPI),a Asociación de Actrices e Actores de Galicia, a Asociación de Guionistas de Galicia, a Asociación de Directores e Realizadores de Galicia, o Observatorio Audiovisual de Galicia e a Academia Galega do Audiovisual denuncian que isto suporá, na práctica, o imposible o funcionamento da entidade como filmoteca de Galicia.
Por iso, todas estas entidades relacionadas co audiovisual en Galicia, que no seu día xa se manifestaron en contra dos planos anunciados pola AGADIC, piden a retirada inmediata das amortizacións de prazas anunciadas pola Xunta de Galicia e a anulación dos despedimentos previstos segundo ese mesmo plano. As entidades consideran que a amortización das prazas e o despedimento de persoal fixo non está en concordancia co expresado en comparecencias públicas polas autoridades culturais galegas nas que se aseguraba que o todo o persoal continuaría nos seus postos de traballo.
Por iso, estes colectivos do audiovisual galego respaldan e animan á participación na concentración que terá lugar este mércore, 6 de xullo de 2016, en Santiago de Compostela en contra destes despedimentos.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.