Todos os deputados do PSdeG votan a Modesto Pose como senador autonómico
Finalmente, o PSdeG apartou as diferencias internas para votar unánimemente a Modesto Pose como senador autonómico, a pesar das divisións existentes nos últimos días. Os candidatos do PP recibiron dous votos da oposición.
Por Europa Press / Redacción | SANTIAGO DE COMPOSTELA | 12/07/2016 | Actualizada ás 10:44
O socialista Modesto Pose foi finalmente elixido senador por designación da Cámara autonómica con 18 votos a favor, tantos como deputados ten o PSdeG no Pazo do Hórreo.
A elección de Pose prodúcese en medio dun forte enfrontamento interno no PSdeG focalizado na confección das listas para as eleccións de outono, pero que se empezou a visualizar con motivo desta acta de senador en días previos da pasada semana.
E é que, fronte á proposta de Pose da dirección do Grupo, avalada pola xestora que dirixe Pilar Cancela, a maior parte dos deputados socialistas preferían que o cargo fora para o parlamentario José Luis Méndez Romeu, ao que apoiaran nas primarias que perdeu (aínda que co 45 por cento dos votos) contra Xoaquín Fernández Leiceaga.
En canto ás outras dúas prazas, que corresponden ao PP, o exalcalde de Verín José Luis Jiménez Morán e o lucense Fernando Carlos Rodríguez saíron ambos os dous nomeados cun total de 40 votos a favor.
No hemiciclo había 38 populares (ausentáronse a deputada Elena González Sánchez, así como o vicepresidente e tamén parlamentario, Alfonso Rueda, e o presidente, Alberto Núñez Feijóo), co que os seus senadores recibiron dous apoios máis doutros grupos parlamentarios.
