A IV edición do premio Galicia de Fotografía Contemporánea rescatará "a importancia da linguaxe instantánea"

A cuarta edición do premio Galicia de Fotografía Contemporánea buscará, un ano máis, promover a creación dun espazo fotográfico na Comunidade que recorde "a importancia da linguaxe instantánea". O prazo de inscrición, que arranca este venres, permanecerá aberto ata o 15 de setembro.

Un dos coordinadores deste galardón, Víctor Nieves, recordou o ideario co que este recoñecemento foi creado no ano 2013, e que ofrece un único premio de 10.000 euros, xunto á publicación dun libro e a promoción do proxecto a través dunha exposición itinerante por diferentes lugares durante dous anos.

O Festival Outono Fotográfico, a Deputación de Lugo e a Xunta de Galicia, colaboran nesta iniciativa que o ano pasado premiou a artista Eva Díez, a exposición da cal se presentará este ano por toda Galicia.

Así mesmo, outro dos coordinadores do premio, Xosé Lois Vázquez, sinalou que a fotografía é "o instrumento do coñecemento máis importante despois da escritura", e converteuse nunha linguaxe instantánea polo que se fai necesario rescatar os traballos daqueles artistas galegos que a practican.

BASES DO PREMIO

Por outro lado, os organizadores indicaron que o xurado estará composto por representantes de todas as entidades colaboradoras e que se aceptará a fotografía realizada con calquera soporte, xa que actualmente "calquera teléfono móbil" pode conseguir unha boa imaxe.

O número de participantes foi aumentando nas tres últimas edicións, aproximándose aos 40 no ano 2015. Ademais, Víctor Nieves destacou que se envían traballos "moi serios e pensados", e puxo como exemplo o gañador da primeira edición, o cal realizou a exposición durante sete anos.

Por outro lado, o secretario xeral de Culura, Anxo Lorenzo, acudiu á presentación e recordou que en Galicia hai moitas persoas dedicadas ao mundo da fotografía, ao que engadiu que este premio non é "superficial", senón que axuda a promover o talento dos participantes.