SANTIAGO DE COMPOSTELA | 23/07/2016 | Actualizada ás 17:28 por EUROPA PRESS
A mesa xestora da Marea Constituínte acordou na súa reunión celebrada este sábado en Santiago de Compostela reiterar o convite a todos os axentes do cambio para participar na asemblea que terá lugar o próximo sábado.
Á reunión asistiron todas as persoas integrantes da xestora: Sara Outeiral, Modesto Renda, Sara Torreiro, Antón Sánchez, Xan Xove, David Bruzos, Verónica Campos, Guillermo Crego, e os alcaldes Martiño Noriega (Santiago), Xulio Ferreiro (A Coruña) e Ferrol (Jorge Suárez).
Segundo recordou nun comunicado, na cita poderanse referendar as bases políticas e programáticas e o modelo de primarias cos que a candidatura do espazo político se presentará ás eleccións autonómicas deste ano. O único necesario para poder asistir é asinar o manifesto dos tres alcaldes na web da Marea Constituínte.
A xestora tamén volveu destacar que o prazo para facer achegas aos documentos base xa está aberto e finaliza o próximo luns ás 19,00 horas. Para presentalas é necesario o aval mínimo de 10 persoas asinantes do manifesto dos alcaldes.
Cada grupo poderá presentar unha achega, total ou parcial, a cada un dos textos, respectando o mesmo formato de pregunta e resposta que xa teñen e conservando a orde definitiva para que a súa tramitación sexan o máis sinxela posible. Deben enviarse ao correo 'marea@mareaconstituinte.gal' antes das 19,00 horas do luns 25 de xullo.
A partir desa hora, iniciarase un proceso de transacción para intentar chegar ao máximo consenso sobre os textos de cara ao acto de Vigo, mediante o traballo conxunto entre as persoas responsables das achegas e os grupos redactores dos documentos de base. Neste proceso, a xestora destacou que será o de mediación, pero non tomará ningunha decisión política. Os acordos serán responsabilidade das partes.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.