A Xunta destaca o papel do Instituto Galego do Viño na posta en valor deste produto

A Xunta destacou o papel do Instituto Galego do Viño (Ingavi) na dinamización, posta en valor e divulgación deste produto agroalimentario, a través de iniciativas de formación e promoción nos ámbitos galego, nacional e internacional.

Así transmitiu a directora xeral de Gandaría, Agricultura e Industrias Agroalimentarias, Belén do Campo, aos responsables desta entidade nun encontro de traballo celebrado en Santiago. Esta reunión serviu para avaliar diferentes propostas do Ingavi para continuar co labor de fomento de educación e divulgación do sector vitivinícola.

A directora xeral ha traslado a director de Ingavi, o sumiller Xoán Cannas, e ao responsable de Mercadotecnia deste instituto, Alberto Granada, a disposición da Consellería do Medio Rural a estudar e avaliar as súas iniciativas, no marco do traballo que desenvolve este departamento da Xunta a favor do viño galego.

En concreto, o Instituto Galego do Viño centra a súa actividade na formación de profesionais, coa vista posta na difusión da cultura do viño en Galicia, a internacionalización dos produtos galegos, o desenvolvemento do potencial enoturístico de Galicia ou a axeitada orientación á calidade e á innovación como estratexia de diferenciación, entre outros obxectivos da súa actuación.