Por Galicia Confidencial | Vigo | 25/07/2016 | Actualizada ás 11:33
"O que vai a Cíes ten que volver de Cíes". Así reza o lema da nova campaña de reciclaxe para a concienciación dos visitantes do arquipélago vigués. En total, repartiranse 20.000 bolsas de lixo aos pasaxeiros que visiten as illas as dúas últimas fins de semana de xullo e as tres primeiras de agosto.
Cada viaxeiro embarcará rumbo ás Cíes con tres bolsas para separar os papeis, os envases plásticos e o vidro, cada unha coa súa cor identificativa. Os pasaxeiros recolleranas no despacho de billetes da navieira na que compre o seu billete. Á volta, deberán tirar o lixo nos colectores de reciclaxe situados na Estación Marítima.
Aínda que ata o momento xa estaba prohibido deixar desperdicios no parque nacional, o obxectivo do Concello de Vigo agora é concienciar aínda máis á poboación da importancia de coidar a paraxe e respectar as especies do hábitat. E, para iso, é imprescindible aprender a separar os residuos e tiralos no depósito correspondente.
Os usuarios das navieiras que operan na Estación Marítima recibirán a pé de despacho de billetes un pack con tres bolsas diferenciadas en cor azul, amarelo e verde para separar, respectivamente, papeis e cartóns, os envases de plástico, latas e bricks así como as botellas e frascos de vidro xerados nas Illas Cíes, para despois poder depositalas nos colectores da recollida selectiva de residuos unha vez de regreso á cidade.
Ademais, recibirán unha pequena guía explicativa con información sobre o Parque Nacional e a súa riqueza natural, animal e vexetal e sobre a campaña que está a levar a cabo a empresa concesionaria da recollida de residuos sólidos urbanos.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.