O PP de Teo (A Coruña) pide a Industria que rectifique a denegación dunha axuda polo envío dun informe en galego

O PP do Concello de Teo (A Coruña) sumouse á petición do Goberno municipal de reclamar ao Instituto para a Diversificación e Aforro da Enerxía (IDAE), dependente do Ministerio de Industria, que rectifique e reconsidere a denegación dunha axuda ao municipio coruñés polo envío dun informe galego entre a documentación achegada ao concurso, algo que para os populares teenses non é "un argumento sólido" para denegar a subvención.

A pasada semana, o Concello de Teo coñecía a decisión do IDAE de non considerar o seu recurso pola denegación dun empréstito por valor de 3,27 millóns de euros para un proxecto de iluminación pública porque nos documentos presentados na solicitude se incluía un informe escrito en galego, unha situación na que tamén se atopan os concellos de Santiago e Santa Comba (A Coruña).

O voceiro dos populares en Teo, José Manuel Guerra, remitiu unha carta ao director xeral do IDAE, Arturo Fernández Rodríguez, na que lle piden que reconsidere a súa decisión e permitan á casa do concello ter "a oportunidade de adecuarse ao establecido" nas bases do concurso.

Así, a través dunha nota de prensa, engadiu que "a inclusión dun documento en galego non parece un argumento nin sólido, nin fundamentado para denegar unha axuda" que cualificou de "importante cuantitativa e cualitativamente".

Así mesmo, Guerra criticou ao Goberno municipal e engadiu que a poboación de Teo "non debe verse prexudicada" polo "nulo proceder do concello nos procedementos administrativos".