Feijóo reitera que sería "un disparate" desoír o 26J e destaca, sobre a investidura, que Rajoy "ten criterio"

O presidente da Xunta, Alberto Núñez Feijóo, reiterou que sería "un disparate político, social e económico" que se volva desoír o resultado das urnas do pasado 26 de xuño, polo que insistiu en que se "facilite" un novo goberno de Mariano Rajoy. Acerca de se debería presentarse á investidura aínda que non teña apoios abondos garantidos, rexeitou dicirlle o que "ten que facer" e proclamou que "ten criterio".

En declaracións aos medios no Parlamento, Feijóo advertiu que Rajoy foi elixido "dúas veces consecutivas" para presidente, toda vez que se presentaron "catro candidatos" e os españois "apoiárono a el" de forma maioritaria. Ao seu xuízo, "todos sabían en que consistía o xogo democrático e que o candidato elixido debe gobernar", polo que os contrincantes de Rajoy deberían "aceptalo e non cuestionar o resultado" ratificado en decembro do ano pasado e de novo en xuño.

Así as cousas, subliñou que sería "un disparate político, social e económico" volver desoír o "resultado nítido" das urnas e subliñou que el segue "posicionándose dentro da boa fe e da política con maiúsculas: que se facilite o goberno do presidente Rajoy, que é o candidato elixido polos españois".

Feijóo insistiu que "a única alternativa" sería unha terceira convocatoria de eleccións xerais. "Non hai ningunha alternativa distinta, pero unhas novas eleccións é algo que os españois non merecemos e que España non se pode permitir", subliñou, antes de manifestar que o seu desexo de que "nos próximos días, que cada día quedan menos," os españois poidan "ter claro" o seu novo goberno.

RAJOY "TEN CRITERIO"

O dirixente popular lamentou a actual situación e, preguntado acerca de que o seu xefe de filas debería presentarse aínda sen os apoios suficientes garantidos á investidura, defendeu que Rajoy "demostrou que ten criterio" durante os seus anos de goberno, así como despois das eleccións do 20 de decembro.

"E estou convencido de que volverá demostralo en agosto: ten criterio, ten información e coñecemento, e sabe o que quere facer: quere que o deixen gobernar e quere ser obediente co resultado das urnas, non menosprezar unha consulta electoral tan importante como unhas eleccións xerais", esgrimiu.

Dito isto, engadiu que a el non lle corresponde "dicir ao candidato o que ten que facer nin ao xefe de Estado (Felipe VI) o que ten que propoñer". "Deixemos que actúen cada un no ámbito das súas competencias", apelou, antes de advertir que gobernar "non é só superar unha sesión de investidura, senón ser útil dende un goberno ao conxunto dos españois; non é soa unha votación, é un proxecto para unha lexislatura", subliñou.

QUE "INTERVEÑAN" OS SEUS PARTIDOS

Feijóo asegurou que non entra "a discutir" que a lexislatura sexa "normal ou curta", pero alertou de que "o que non se pode é esperar polo teito de gasto e a lei dos presupostos" nin permanecer "todos mirando" para que "dous políticos en España" decidan "o que van facer os 47 millóns de españois".

"Se estes políticos, que nunca gañaron unhas eleccións, van decidir o que vai facer o conxunto de España, espero que os seus partidos interveñan e os fagan ver que, por enriba dos currículos profesionais de dous políticos, están os seus partidos e está o país", resolveu.