SANTIAGO DE COMPOSTELA | 27/07/2016 | Actualizada ás 13:55 por EUROPA PRESS
O operario ferido no incendio rexistrado no concello lucense de Ribas de Sil continúa evolucionando favorablemente das súas queimaduras, aínda que o seu estado continúa sendo grave.
Así o confirmaron a Europa Press fontes do Complexo Hospitalario Universitario de A Coruña (Chuac), onde o home permanece ingresado na Unidade de Queimados.
O traballador, condutor dunha motobomba, resultou ferido de carácter grave por queimaduras mentres traballaba na extinción do incendio forestal, despois de que un cambio na dirección do vento provocase unha variación brusca do sentido das lapas, que atraparon o vehículo.
No mesmo suceso resultaron afectados por queimaduras, aínda que de menor entidade, un axente e un técnico. Así mesmo, outro condutor de motobomba resultou lesionado tras envorcar o vehículo que conducía e un peón sufriu un golpe de calor.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.