O Foro do Camiño denuncia que a Xunta altera a Ruta Xacobea con obras e por "intereses comerciais"

O Foro do Camiño, composto por 30 organizacións defensoras das rutas xacobeas, denunciou a alteración do Camiño Primitivo e o do Norte debido ás obras de "recuperación, acondicionamento e mellora" levadas a cabo pola Axencia de Turismo de Galicia. Ademais, acusa á Xunta de facer cambios nas vías en favor de "intereses comerciais".

Nun comunicado, o Foro do Camiño indicou que enviou un informe ao Comité Nacional Español do Consello Internacional de Monumentos e Sitios Histórico-Artísticos (Icomos-España) para denunciar que estas obras "xa alteraron 12 quilómetros" na súa primeira fase de execución e que continuarán facéndoo durante os próximos meses.

O Foro asegurou tamén que se trata de accións que "atentan" contra a "fisionomía tradicional" dos camiños históricos de peregrinación.

Nesta liña, denunciou que esta actuación "vulnera a lei 3/1996" de protección das rutas xacobeas, unha normativa na que se definen como "bens de carácter cultural" asociadas a un territorio histórico e non como "camiños funcionais" de "tránsito ou mercado turístico-comercial".

Neste sentido, membros das organizacións que conforman o Foro afirmaron que estas obras son contrarias aos criterios determinados por Icomos-España nun informe emitido para a Unesco en 2007, no que determinaba o enfoque que as administracións públicas deberían adoptar para preservar o carácter das rutas xacobeas.

"MODIFICACIÓN" DAS RUTAS

Así mesmo, denunciou a "modificación" das vías en favor de "intereses comerciais", así como a "derivación das competencias" sobre a protección e posta en valor das rutas á Axencia de Turismo, malia que "por lei" corresponden á Dirección Xeral de Patrimonio Cultural e á Consellería de Cultura, Educación e Ordenación Universitaria.

Ademais, lamentou que, debido a estas accións, se fomente o "modelo de peregrino" que percibe o Camiño como unha "proba deportiva" e non como un modo de coñecer o patrimonio de Galicia.

Por estas razóns, o Foro do Camiño instou a Icomos-España a apelar á responsabilidade da Xunta na "conservación e protección" do Camiño, a "evitar" a execución das obras previstas e a "informar" desta situación á Unesco.