Quen difunde as crises en Podemos, as mareas, PSdeG ou BNG?
O xefe do Executivo galego di que non hai debate sobre as eleccións galegas e apunta aos xornalistas como difusores das crises no resto de partidos.
Por Xurxo Salgado | Compostela | 28/07/2016 | Actualizada ás 16:00
Aínda non hai data das eleccións galegas. Será en outubro, “no entorno do 20 de outubro”, segundo apuntou o mércores o voceiro do PP, Miguel Tellado, pero o presidente galego, Alberto Núñez Feijóo segue sen aclarar cando vai ser a data exacta. Por iso, preguntado se non cre que fomenta este debate de datas para tapar outros problemas, apuntou directamente aos xornalistas.
“Debates políticos hai moitos e os xeran os xornalistas, non eu... E hainos en Podemos, nas mareas, se aos de Podemos non lle gustan as mareas, os que non poden ir nas listas do PSOE, os problemas do BNG para conformar as listas...”, dixo ironicamente sen apuntar a ningún “problema” do PPdeG do que falen os grandes medios.
E é que para o presidente galego a axenda política, e falar dos problemas das distintas formacións políticas, que curiosamente son a súa oposición, é cousa dos medios, ou da política dos grandes medios do país. Obviamente, nesas crises non citou os problemas xudiciais do seu partido, nin os recortes en educación ou sanidade que algúns dos grandes medios evitan publicar.
Sobre a data das eleccións, Feijóo insistiu que non as convocou en decembro pasado, nin en maio deste ano para “non trasladar a inestabilidade do Estado a Galicia”. “Iso débollo aos galegos”, dixo na rolda de prensa posterior ao Consello da Xunta. Por iso, xustificou non ter convocado os comicios galegos coincidindo coas xerais e adiantou que tampouco o fará se hai unhas terceiras eleccións para que Galicia “non entre na mesma deriva de risco institucional que o conxunto do Estado”.
