“Cariño, esta rolda de prensa non é para ti”
A tensión interna entre algúns cargos da ‘vella garda’ do PSdeG e a nova dirección subiu hoxe un chanzo debido a un incidente diante dos xornalistas. A deputada Carmen Gallego expulsou dunha rolda de prensa a actual xefa de prensa do partido. Despois denunciou a suposta atitude antidemocrática da xestora.
Por Galicia Confidencial | Santiago de Compostela | 29/07/2016 | Actualizada ás 14:31
“Cariño, non é para ti esta rolda de prensa, Mercedes”, espetoulle Gallego á empregada do PSdeG cando os micrófonos xa estaban abertos para unha comparecencia nunha das salas do Parlamento. A deputada insistiu até que botou do acto a xefa de prensa argumentando en voz alta diante dos informadores que “non es xornalistas acreditada por ningún medio de comunicación”.
Gallego convocara aos xornalistas para dar o seu punto de vista crítico sobre o proceso de elección dos candidatos para os comicios autonómicos. A deputada pontevedresa denunciou uns supostos modos antidemocráticos aplicados por parte dos partidarios da xestora e de Xaquín Fernández Leiceaga, o vencedor nas recentes primarias. Como exemplo, a ex-conselleira puxo Vilagarcía, onde dixo que se impediu a votación das listas.
Leiceaga esquiva o conflito
Cuestionado por estas críticas, Leiceaga lavouse as mans. “Non vou entrar nisto”, declarou esta mañá. O candidato argumenta que é a xestora a responsábel do proceso que nestes días está a configurar as listas dos socialistas galegos, proceso no que el di non intervén. Gallego foi un dos cargos que apostou polo seu rival nas primarias, o derrotado José Luís Méndez Romeu.
Resultados nalgunhas localidades
Mentres a polémica interna faise cada vez máis evidente, continúan as asembleas locais. Pablo López, Rodríguez Dacosta e Noela Blanco foron os máis votados para as listas en Ourense na asemblea de onte. Tamén o xoves houbo asemblea en Compostela. Guadalupe Rodríguez, Eva Martínez e Pablo Arangüena foron os nomes con máis apoios en Santiago.
