Condenado a 2 anos de prisión e a indemnizar con case 41.000 euros á Xunta por un incendio en Lalín en 2013

O xulgado do Penal número 1 de Pontevedra condenou a un home, M.C.G.P., a dous anos de prisión e a indemnizar con case 41.000 euros á Consellería de Medio Rural --o gasto do operativo de extinción-- por un incendio que provocou en Lalín (Pontevedra) en 2013.

Nun fallo do 6 de xullo ao que tivo acceso Europa Press, figura que esta condena por delito de incendio forestal ten como atenuantes as dilacións indebidas no proceso --que estivo paralizado durante sete meses-- e que o autor confesou. Ademais, da indemnización á Xunta, deberá aboar preto de 110 euros á comunidade de montes de Zobra, xa que o lume afectou ás súas parcelas, unido a unha multa de 1.800 euros (unha cota diaria de cinco euros durante un ano).

Na sentenza de conformidade, despois de que o acusado confesase --o fallo é firme, xa que as partes se comprometen a non recorrer-- , recóllese que o agora condenado transcorreu en coche entre as 2,00 e as 2,30 horas da madrugada do 11 de setembro de 2013 por pistas forestais e a estrada existente no zona que une os lugares de Castiñeira e Zobra, en Lalín (Pontevedra), "coa intención de queimar o monte".

Así, coa axuda dun chisqueiro, prendeu lume á vexetación seca do chan causando 12 lumes que queimaron un total de case 10 hectáreas de zona arbolada e preto de 38 hectáreas de monte raso. As actuacións xudiciais iniciáronse tras un atestado da Garda Civil.

De tal forma, os servizos de extinción da Consellería de Medio Rural traballaron durante unhas 18 horas ese 11 de setembro, o que provocou un gasto de 40.894 euros, a cantidade que agora deberá aboar o causante.

Sobre esta sentenza, a conselleira de Medio Rural, Ángeles Vázquez, pronunciouse este venres para deixar claro que "queimar o monte non sae gratis".