Por Europa Press / Redacción | Santiago de Compostela | 29/07/2016 | Actualizada ás 23:24
Podemos Galicia acordou este venres a pregunta que formulará na consulta telemática que realizará a todos os inscritos desde este domingo, día 31 de xullo, ata o vindeiro martes, día 2 de agosto, sobre a forma na que concorrerá ás próximas eleccións autonómicas.
"Como queres que concorra Podemos ás eleccións galegas?", sinala a cuestión que deixa para os inscritos na formación dúas posibles respostas: "A) En alianza electoral con outras forzas políticas e sociais do cambio (como Esquerda Unida, Anova ou as mareas)" ou "B) En solitario".
Disto informaron este venres aos medios fontes da dirección de Podemos Galicia despois de que o xoves a dirección estatal de decidise non convocar a pregunta que acordou unha comisión do Consello Cidadán Autonómico sobre as alianzas para as galegas ao non responder a consulta aos documentos cos que a secretaria xeral da formación morada, Carmen Santos, presentouse ás primarias internas.
Deste xeito, a cuestión non inclúe na súa formulación a posibilidade de acudir ás urnas como partido instrumental, como defenden as diferentes sensibilidades promotoras da Asemblea Constituínte que terá lugar este sábado en Vigo e entre as que se atopan os alcaldes da Coruña (Xulio Ferreiro), Ferrol (Jorge Suárez) e Santiago (Martiño Noriega).
Consulta presencial
Na parte final da asemblea os inscritos poideron votar. A escolla entre as dúas opcións non ten carácter vinculante, senon "meramente consultiva", segundo informou o partido morado nas redes sociais. Podemos Galicia admitiu que a votación fíxose "despois de marchar moita xente da Asemblea". Con todo, difundiu os resultados: vitoria esmagadora da opción de presentarse en solitario (156 sufraxios) fronte a coalición (só 36 sufraxios). De repeterise este resultado na vía telemática, moi probablemente non haberá confluencia da esquerda galega.
Carmen Santos
Preguntada polos medios sobre esta consulta, Carmen Santos destacou que a pregunta final foi aprobada despois de que "a dirección estatal que autoriza este tipo de consultas recoñecese a lexitimidade de formulala en consonancia co documento político organizativo dos estatutos".
A esta cuestión, tras coñecerse a pregunta, fontes críticas coa dirección de Podemos Galicia consultadas por Europa Press aseguraron que "a pregunta tivo que impoñela" a dirección estatal despois de que a secretaria xeral, Carmen Santos, "rompese o consenso" alcanzado en negociacións mantidas "ao longo de toda a xornada do xoves". Con todo, valoraron que "non se use a palabra coalición", co que, na súa opinión, "déixase aberta a porta a calquera forma xurídica".
Xuntos Podemos
Pola súa banda, en declaracións aos medios, o líder da corrente crítica Xuntos Podemos avanzou que son partidarios de concorrer en alianza electoral xunto a outras formacións "sempre que se respecte o peso específico que ten que ter Podemos nesta alianza".
"Unha vez que Mareas en Común ten o seu partido, nós témonos que sentar nas mesas para negociar e confeccionar as listas, pero nesas listas Podemos ten que ter un maior peso, o que se lle debe polo seu poder electoral e número de inscritos", apuntou.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.