A Feira do Libro da Coruña acollerá unha exposición fotográfica que fará viaxar ao espectador aos anos 20

Unha exposición fotográfica editada por Luciano Roisin permitirá aos visitantes viaxar á cidade da Coruña nos anos 20 dende este luns, día 1, ata o 10 de agosto, no marco da Feira do Libro da cidade herculina.

As instantáneas foran editadas por Roisin en 1925 e non volveran a ser difundidas ata este sábado, segundo indicou nun comunicado Alvarellos Editora, promotora desta mostra.

En concreto, trátase de 12 imaxes panorámicas comercializadas nos anos 20 como postais de gran formato nas que se reflicten escenas urbanas. As instantáneas, que pertencen ao arquivo da editorial e que se exporán na súa caseta, mostran a praia de Riazor, o edificio do Banco Pastor, os Cantóns co Grande Hotel Londres, o Palace e o Atlantic Hotel; a Torre de Hércules e o porto, entre outros.

Posteriormente, as postais serán distribuídas polo resto de España. Ademais, a editorial tamén creou unhas postais de grande formato que porá á venda na Feira do Libro da cidade.

PRESENTACIÓN

Así mesmo, no marco da Feira do Libro da Coruña, o escritor Diego Giráldez, presentará este luns, día 1, ás 19,00 horas, a súa obra 'Galería de saldos'', acompañado polo director de Edicións Xerais, Manuel Bragado, e o xornalista de Radio Galega Kiko Novoa.

'Galería de saldos', que supón o debut literario de Giráldez no xénero da narrativa, está conformada por 28 relatos curtos nos que as vidas dos personaxes se mesturan con reproducións de obras de arte coñecidas.