Xavier Alcalá incorpórase as listas de Compromiso por Galicia
O escritor é un dos persoeiros que pecha as candidaturas do partido galeguista nuns comicios que son claves para consolidar esta formación tras a marcha dalgúns destacados militantes ás mareas.
Por Europa Press / Redacción | SANTIAGO DE COMPOSTELA | 20/08/2016 | Actualizada ás 22:11
Compromiso por Galicia aprobou este sábado as súas listas para as eleccións autonómicas do próximo 25 de setembro, tras o que o cabeza de lista pola provincia de A Coruña e candidato á Presidencia da Xunta, Xoán Bascuas, mostrou o seu "optimismo" para conseguir traer "o cambio en clave de país, positivo e comprometido".
Segundo trasladou o partido a través dun comunicado, Bascuas resaltou que as listas están conformadas por "homes e mulleres que provén de pobos e de cidades de Galicia", que tratarán de contribuír a poñer "sentido común ao cambio que se aveciña".
"Compromiso é unha forza da xente do pobo e que non endebeda a ninguén máis que ao pobo que nos levará ao Parlamento para traballar por el", destacou. Ademais, recordan que foron "a primeira formación" en elixir as súas cabezas de lista polas catro provincias.
Así, pola provincia de Pontevedra, o partido situou como cabeza de lista o enxeñeiro técnico agrícola Andrés Núñez Rajoy; por Ourense, ao profesor de Dereito Constitucional Xosé Mosquera Caseiro; na provincia de Lugo, ese posto ocúpao o técnico intermedio en prevención de riscos laborais Juan Carlos Piñeiro; e, por último, pola provincia de A Coruña o propio secretario xeral da formación, Xoán Bascuas.
Por outra banda, tamén subliñou as figuras do enxeñeiro e escritor Xavier Alcalá, o médico e defensor do dereito das mulleres, Xosé Lois Doval e o avogado Xan M. Pérez Nartallo, os que pechan as candidaturas polas provincias de A Coruña, Ourense e Pontevedra respectivamente.
