Por Galicia Confidencial | Santiago de Compostela | 23/08/2016 | Actualizada ás 14:49
A treboada no PSdeG non amaina malia a proximidade da campaña. O alcalde de Vigo segue moi enfadado porque o aparato estatal cambiou as listas de Pontevedra para incluír ao seu rival local, o seu sobriño Gonzalo Caballero. A pesar dos chamamentos á unidade ante o evidente desgaste mediático, Abel Caballero non se vai calar. E tampouco os críticos de Ourense. Mentres, no PPdeG frótanse as mans.
O edil lembrou que a lista “liderada por Vigo” fora “pactada e dialogada” co aparato galego. Caballero di que logo foi “cambiada nos despachos, en contra das bases, en contra dos que gañaron as eleccións”. Para el isto supón un precedente inédito que pon en perigo o carácter “municipalista” do PSdeG.
O alcalde asegura que ninguén - nin o candidato nin a presidenta da xestora- falou con el para explicarlle porque pediron a Ferraz os cambios en virtude de “razóns que non entendo nin admito”. Caballero volveu a enarborar un discurso moi localista, lembrando que el critica ao goberno de España e da Xunta cando cre discriminan a Vigo, polo que agora fará o mesmo co seu partido por supostamente discriminar a capital olívica ao ascender a postos de saída ao líder do sector crítico, aliado local do candidato Xaquín Fernández Leiceaga.
Non pintan mellor as cousas para o PSdeG en Ourense, a outra provincia na que Madrid impuxo cambios nas listas. María Quintas, a secretaria de organización provincial, dixo esta mañá que “nos sentimos absolutamente estafados e defraudados”. Ela foi unha das prexudicadas, ao caer do terceiro ao quinto posto. Quintas admite que “foi un disgusto a nivel personal” e arremete con dureza contra o seu partido: “parece que hai unha decisión de que os socialistas de Ourense non deben estar ou deben desaparecer”. Desafiante, Quintas lembroulle a cúpula do PSOE que en Ourense hai “un grupo de xente que non se vende por un postiño”.
En definitiva, que as polémicas de Vigo e Ourense non teñen visos de amainar. O candidato á Xunta parece tomalo con calma, evitando alimentar a polémica. Iso si, Xaquín Fernández Leiceaga aproveita para lanzarlle algún recado a Caballero. “Ao alcalde tamén e interesa que o PSOE teña un bo resultado en Vigo” espetoulle hoxe; antes de lembrar que todos teñen sitio na vida interna do partido aínda que non haxa prazas para todos nas candidaturas.
Mentres, o PP sorrí cada vez máis. Despois do enorme rebumbio nas mareas ao fío das dúbidas de Podemos e as primarias, agora o PSdeG é quen se enlama en discusións internas.
Hoxe Alberto Nuñez Feijóo comprometeu que o PP vaise centrar nas súas propostas de goberno e non vai perder nin un minuto nas leas doutros. Claro que deseguido dixo que os outros “se están a desesperar por evitar fugas no seu partido”. É dicir, dicindo entre liñas que a ira de Caballero pode ser tal que o alcalde decida rachar co PSOE.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.