A UPG fai unha lectura electoral galega do veto a Otegi
A principal formación dentro do Bloque argumenta que a prohibición contra o líder vasco demostra que o nacionalismo é a verdadeira vía de ruptura co actual réxime.
Por Galicia Confidencial | Santiago de Compostela | 25/08/2016 | Actualizada ás 11:54
UPG, o partido máis numeroso dentro do Bloque, fai unha lectura electoral en clave galega da decisión da Xunta Electoral de impedir a participación de Arnaldo Otegi como candidato de EH Bildu. Na súa opinión, “o Estado acaba de certificar, máis unha vez, que o voto ao nacionalismo é o que realmente lles doe”.
O BNG foi o único partido galego en tratar de por a cuestión de Otegi no primeiro plano do debate político, en termos moi similares aos que agora expresa nun comunicado a UPG.
O partido que lidera Néstor Rego argumenta que coa decisión xudicial “fica claro que o obxectivo principal do aparello do Estado é tentar frear o avance do nacionalismo e do soberanismo por ser o verdadeiro elemento de ruptura política”. Fronte a esta suposta persecución, o partido comunista prevé que o voto soberanista vai aumentar en Cataluña, Euskadi e Galicia. A UPG expresa a súa “plena solidariedade” co ex-recluso.
