SANTIAGO DE COMPOSTELA | 25/08/2016 | Actualizada ás 19:19 por EUROPA PRESS
O presidente da Xunta, Alberto Núñez Feijóo, mostrouse este xoves "optimista" á vista dos últimos datos do PIB, que sitúan a Galicia ante unha "aceleración da recuperación económica", e tamén debido ás boas cifras de consumo dos fogares e dos números "récord" das exportacións.
"É unha consolidación dun cambio de tendencia que xa dura moitos trimestres", observou Feijóo, ao ser preguntado polos xornalistas en alusión á suba do PIB galego un 0,8 por cento no segundo trimestre do ano en relación co primeiro.
Con estas cifras, tal e como resaltou o presidente na súa comparecencia tras o Consello da Xunta, supón que o crecemento interanual da economía galega se sitúa xa no tres por cento, co cal "supera as previsións" gobernamentais.
Sobre a cifra do último trimestre, contrastou o 0,8 por cento de Galicia co 0,4 por cento de Alemaña. "É o dobre", resaltou, para defender que estes datos "claramente positivos confirman que se acelera a recuperación". "Crecemos ao maior ritmo dos últimos oito anos", concluíu, antes de subliñar que iso "significa boas noticias".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.