A Xunta contrata a loxística das eleccións a un grupo creado por ex-altos cargos da propia Xunta
Os que foron directores xerais do IGAPE e de Informática da Xunta fundaron Netaccede, matriz da empresa que, grazas a un procedemento negociado sen publicidade, levará a web e o teléfono das eleccións.
Por Manuel Vilas | Santiago de Compostela | 26/08/2016 | Actualizada ás 08:00
A Xunta de Galicia acaba de resolver un dos contratos para as eleccións autonómicas. A gañadora do concurso para “servizo de asesoramento na planificación, organización, execución e control do proceso electoral, operativo dos representantes da Administración nos colexios electorais, xestión e control de incidencia, páxina WEB electoral, teléfono do elector e outras actividades organizativas necesarias para a celebración das eleccións” é Contacnova SL.
O administrador único desta Contacnova é Netaccede, empresa fundada en 2000 por, entre outros, varios altos cargos da Xunta na era Fraga. Segundo publicou La Voz, na creación de Netaccede participaron o ex director xeral do Igape Diego Ramón Diz Fernández e o ex director xeral de Informática da Xunta, José María Matas.
A Consellería de Presidencia adxudicou o contrato mediante o procedemento negociado sen publicidade. É dicir, sen publicar uns pregos para que se puidesen presentarse todas as empresas. Polo contrario, o Goberno pediu prezo só a determinadas sociedades. En concreto, a catro: SACE, SCYTL e Deloitte. Unicamente a gañadora e a multinacional Deloitte presentaron ofertas.
En definitiva, a Xunta gobernada polo PP contrata restrinxindo a competencia a un grupo empresarial que foi fundado no seu día por persoas da propia cúpula doutro goberno do PP.
Segundo o Rexistro Mercantil, o responsábel do IGAPE Diego Ramón Diz Fernández foi o presidente de Netaccede até 2012, cando faleceu con 72 anos de idade. A súa esposa foi conselleira da consultora até o ano pasado. O avogado coruñés foi o responsábel do IGAPE durante máis de catro anos no fraguismo e posteriormente a Xunta nomeouno presidente do CIS (Centro de Innovación e Servizos ) de Ferrol entre 2003 e 2005, até que se xubilou.
O grupo vigués Netaccede, tamén coñecido como Netglobal, é un dos principais operadores de centros de chamadas en Galicia. Previamente a este contrato, en 2014, Luisa Lores, membro da Federación de Asociacións para a Defensa da Sanidade Pública, denunciou que “la Xunta de Feijóo cede el teléfono de cita previa en Atención Primaria y el teléfono informativo 012 al fondo de inversión Netaccede, constituido por exaltos cargos del gobierno gallego”. Manuel Marín, portavoz da citada asociacioń, publicou que o presidente de Netaccede “ o exdirectivo de Deloitte Marcelino Otero, ata fai pouco presidente do Club Financeiro de Vigo”.
A filial de Netaccede cobrará polas eleccións case 280.000 euros, o que supón unha rebaixa dun 43% respecto aos 413.000 que estaba disposto a pagar o goberno.
