O ciclo 'Atardecer no Gaiás' despídese da man de bandas galegas, unha homenaxe a David Bowie e sesións dj

O ciclo 'Atardecer no Gaiás', que se celebra na Cidade da Cultura (CdC), despedirase este fin de semana da man de bandas galegas, unha homenaxe a David Bowie e dúas sesións dj.

En concreto, este xoves, día 25, dará comezo na praza central cunha sesión dj a cargo de Bigote Mix, que dará paso á proxección do filme 'The man who fell to the earth', no que David Bowie interpreta a un extraterrestre, segundo explicou a Consellería de Cultura, Educación e Ordenación Universitaria. Deste modo, búscase homenaxear o músico.

Este venres, día 26, a praza central da Cidade da Cultura acollerá dúas actuacións musicais. A primeira en subir ao escenario será Diola, xurdida das cinzas de Unicornibot. Posteriormente, Kill Kill! presentará o seu álbum debut 'Reaccións a distancia', que discorre polo post hardcore, o indie rock noventero e o pop.

Finalmente, o ciclo despedirase este sábado, día 27, na praza central, coa actuación de tres bandas galegas, das que dous foron finalistas do certame Xuventude Crea 2015.

En concreto, Diariodeverano achegará sons de pop e Fripp & Kitte centrarase no soul e o folk. Mentres, a banda viguesa de rock The Soul Jacket presentará o seu disco 'Black Cotton Limited'. Despois dos concertos, o dj Furia de Timotei será o encargado de pechar o ciclo cultural en A Cantina do Gaiás.