Ciencia para mellorar o rendemento dos cultivos de mazá de sidra galega

A marca de sidra de Hijos de Rivera, Maeloc, ampliou o seu ámbito de investigación co obxectivo de mellorar o rendemento dos cultivos de mazá en Galicia. A compañía seguirá así avanzando co programa de investigación que presentou en 2013, co que pretende dotar dunha base científica á produción de mazá sidreira en Galicia.

Mediante o Proxecto Maeloc, a marca de sidra galega leva a cabo "un minucioso estudo" de variedades de mazás autóctonas coa colaboración de entidades e organismos públicos. A través de cinco campos de ensaio en diferentes puntos da xeografía galega e coa colaboración do servizo de información agrometeorolóxica de Meteogalicia e a Consellería do Medio Rural, recentemente incorporou dúas novas situacións. Trátase de Chantada (Lugo) e Ortigueira (A Coruña), que se unen á rede que xa dispoñía de datos de Aranga, Bergondo, Sarria, Ribadeo, Sada e A Estrada. Con iso, aspira a avaliar a sensibilidade das diferentes variedades de mazá a pragas e enfermidades a través de avisos fitosanitarios en puntos xeográficos diversos.

"A importancia desta acción radica en ser capaces de poñer a disposición dos agricultores variedades cunha resistencia xenética elevada ás enfermidades", resalta a compañía.

ESTUDO

A caracterización e identificación de variedades de mazá sidreira en Galicia é o principal obxectivo de Maeloc, que deu o seu nome a este estudo, unha iniciativa que se desenvolve dende este ano 2013 coa colaboración da Xunta de Galicia, o CIAM (Centro de Investigacións Agrarias de Mabegondo), a USC (Universidade de Santiago de Compostela), o CFEA de Guísamo e o CFEA de Monforte.

O estudo apoiase principalmente nos campos de ensaio coas variedades escollidas e o desenvolvemento de xornadas de divulgación para produtores e asociacións do sector. Actividades que se desenvolven seguindo un plan de 2013 a 2017 en distintas fases.

VARIEDADES

Entre as variedades estudadas, atópanse as comunmente chamadas gravillán, jamardo, José Antonio, negras, marafonsa, ollo, landoi, peros de Chantada, rabiosa, repinaldo, mouro e de la riega

Con estas mazás, Maeloc produce na súa fábrica de Custom Drinks, en Chantada (Lugo), as súas sete variedades de sidra. Dende hai varios anos, segundo resalta a propia compañía, potenciou o cultivo de mazá ecolóxica "traballando man a man cos agricultores implicados no proxecto".

"Isto permitiu que, a día de hoxe, un 50% da mazá sidreira adquirida e procesada por Maeloc para a elaboración das súas sidras conta co certificado do Consello Regulador de Agricultura Ecolóxica en Galicia", explica.