Leiceaga promete "un programa de saneamento" de rías e ríos para mellorar as súas oportunidades económicas

O candidato do PSdeG á Presidencia da Xunta, Xoaquín Fernández Leiceaga, comprometeuse este luns a poñer en marcha "un programa de saneamento e tratamento" dos ríos e as rías galegas, co obxectivo de poñer as augas "no estado no que deben estar" e, así, poder "gozar" máis delas e xerar tamén oportunidades económicas "maiores" das que ofrecen ata agora.

"Será o noso compromiso, e a iso dedicaremos moitos esforzos", asegurou Leiceaga tras unha visita ao río Sar ao seu paso por Bertamiráns acompañado polo alcalde de Ames (A Coruña), José Miñones. Neste punto, o rexedor socialista denunciou o "estado de abandono" desta canle fluvial, ata o punto de provocar "cheiro", e urxiu a nova depuradora de Santiago para solucionar esta situación.

Ante isto, o aspirante á Presidencia da Xunta censurou a xestión "moi deficiente" dos fondos europeos posta en marcha polo Executivo que lidera Alberto Núñez Feijóo, "máis centrada na aparencia que en resolver os problemas". "É o que permite que casos como o deste río sigan presentes aínda hoxe en Galicia", advertiu.

E é que a contaminación das augas, tal e como remarcou, "ten moita importancia" non só polas "dificultades" que ocasionan aos veciños senón tamén por cuestións relacionadas co ocio e o turismo. "Hai paseos fluviais perfectamente ordenados pero que non poden ser utilizados polo cheiro que emana do río", exemplificou, antes de alertar dos danos ao sector marisqueiro.

Centrado no río Sar, que discorre entre Santiago e Padrón, incidiu en que as súas verteduras afectan aos bancos marisqueiros da ría de Arousa e esgrimiu como proba que "tiveron graves problemas e tiveron que pechar demasiado tempo" durante os últimos anos. Fronte a iso, o socialista deixou "ben claro" o seu "compromiso" en favor da recuperación do "saneamento integral" das augas.

Ao fío diso, Fernández Leiceaga apostou por construír "un corredor verde de Santiago ao mar de Arousa", ligado ao río Sar, que permita "conectar ben unha cidade importante e o seu ámbito cunha das rías máis fermosas".