Que pensan os grandes partidos das últimas enquisas?
o PPdeG di que revalida a maioría absoluta, o PSdeG que a perden, En Marea que pode liderar o cambio e o BNG que os datos "non son fotos fixas".
- Dúas novas enquisas dan maioría absoluta a Feijóo e meten a Ciudadanos no Parlamento
- A suma de En Marea, PSdeG e BNG permitiría un goberno progresista
Por Galicia Confidencial | Compostela | 29/08/2016 | Actualizada ás 15:12
Os datos das distintas enquisas de La Voz, La Región e La Razón que se fixeron públicas esta fin de semana deixaron contentos a todos os grandes partidos. Cada un deles interpreta os resultados ao seu xeito. Así, mentres uns resaltan a perda da maioría absoluta do PPdeG, os populares salientan aqueles inquéritos na que revalidan esta maioría.
Neste sentido, o secretario xeral do PPdeG, Miguel Tellado, considerou que as enquisas sobre intención de voto mostra que é "posible" revalidar a maioría absoluta. As enquisas "revelan que a maioría á que aspira o PPdeG con Alberto Núñez Feijóo é moi difícil pero, en calquera caso, é posible", sinalou Tellado nun comunicado.
Pola súa banda, o candidato socialista á Presidencia da Xunta, Xoaquín Fernández Leiceaga, mostrouse convencido de que é posible "construír unha alternativa" de esquerdas que estea "liderada" polo seu partido.
Preguntado polos xornalistas sobre a posibilidade de que o seu partido caia até a terceira posición na orde de prioridades dos galegos, Leiceaga quedo con que as últimas sondaxes refiren "un avance" nos votos á súa formación durante o mes de agosto "a pesar de todos os pesares", en alusión aos problemas internos que saíron á luz durante este verán.
En paralelo, deu por feito que, do mesmo xeito que ocorreu nas últimas eleccións xerais, os indecisos acabarán "envorcándose" no PSOE. "Vannos a dar un resultado por encima do que indican algúns estudos demoscópicos", augurou.
Opcións de cambio
De moi diferente opinión é En Marea. Así, o alcalde de Santiago, Martiño Noriega, considerou que "pode haber opcións de cambio" en Galicia e que este "pode ser liderado por En Marea" tras as eleccións autonómicas do próximo 25 de setembro.
Noriega destacou que o cambio pode converter o candidato á Presidencia da Xunta de En Marea, Luis Villares, no próximo dirixente autonómico e opinou que, se isto sucede, sería un "digno" presidente.
Ademais, sinalou que, para que se produza o resultado desexado nos comicios, o partido instrumental -- no que se integran Podemos, Anova e Esquerda Unida-- "debe traballar" e facer chegar o seu programa electoral á cidadanía a través da figura do exmaxistrado Villares, cabeza de lista e "referente" da candidatura.
Non obstante, advertiu de que as enquisas deben "tomarse con precaución" xa que durante este ano mostraron que se "equivocan" -- en relación ás sondaxes que vaticinaban un 'sorpasso' de Podemos ao PSOE nas pasadas eleccións do 26 de xuño, adianto que finalmente non se produciu -- . Así, indicou que as enquisas deben "entenderse como parte do proceso electoral".
Finalmente, e ao ser preguntado polas últimas enquisas publicadas sobre os resultados dos comicios, o dirixente do BNG, Rubén Cela, destacou que "non son fotos fixas" e que a campaña "vai ter o seu efecto" no electorado. "Calquera cambio pasa polo BNG, non estamos aquí só para modificar as caras do goberno", subliñou.
Ademais, denunciou que os galegos deben ser "donos dos seus propios impostos", polo que apuntou que "hai que blindar o benestar para superar o marco actual". Por iso, lembrou que as leis hai que cumprilas pero "non poden ser cosés".
