Manuel Martínez asegura que o presidente da Deputación non pode recorrer os estatutos de Suplusa

O deputado non adscrito na Deputación de Lugo e vicepresidente da Sociedade Urbanística Provincial (Suplusa) advertiu este luns ao presidente, Darío Campos, que "non ten ningunha posibilidade de recorrer" a proposta de modificación dos estatutos do organismo aprobadas polo consello de administración no pleno do 28 de xullo.

O consello de administración de Suplusa aprobou o 28 de xullo unha proposta de modificación dos estatutos da sociedade, que debería ser ratificada nunha reunión da xunta xeral a convocar nun prazo máximo de vinte días, é dicir o 13 de agosto como data límite.

O obxectivo é cambiar o obxecto social da empresa pública, co fin de que sexa recoñecida como prestadora de servizos sociais. Esta sería a modalidade para asegurar a posta en marcha das residencias da terceira idade que está a auspiciar a Deputación na provincia.

Martínez decidiu, o pasado venres, asumir as funcións da presidencia e convocar pola súa conta a reunión da xunta xeral de Suplusa co argumento de que Campos estaba "ausente".

Con todo, Campos remitiron pouco despois un escrito ao secretario do ente para declarar sen efecto esa reunión e avanzou que estaba a "estudar recorrer a proposta de modificación dos estatutos".

Martínez respondeu hoxe que os acordos do consello de administración son "claros, contundentes e axustados á lexislación en materia de empresas dirixidas pola administración".