Informáticos do Sergas manteñen a folga dos días 1, 2 e 5 de setembro para recuperar as súas condicións laborais

Os traballadores da empresa Tecnocom, encargada do mantemento do soporte técnico informático do Servizo Galego de Saúde (Sergas), manifestáronse este luns para solicitar a recuperación das condicións laborais previas á súa "modificación unilateral" e manteñen unha folga de tres días.

Segundo trasladou a CIG a través dun comunicado, o persoal acordou convocar varias xornadas de folga para os días 1, 2 e 5 de setembro, apoiada por varias empresas TIC da capital galega como son Bahía Software, Dinahosting, Contact Nova e Balidea, así como a sección sindical da CIG en Coremain.

Este colectivo concentrárase o pasado venres co mesmo obxectivo, nesa ocasión diante do seu centro de traballo, no Hospital Psiquiátrico de Conxo (Santiago), e para demandar ao Sergas que non permita a "explotación dos seus traballadores".

A CIG defendeu que a decisión de modificar as condicións laborais foi unha "represalia" para asustar os traballadores por reclamar unha compensación por un festivo traballado. Non obstante, segundo sinalou, "lonxe de conseguilo", convocouse unha folga que "afectaría usuarios e os profesionais do sistema de saúde".

SOLICITUDE

Ao fío diso, explicou que estes profesionais desenvolven a súa actividade en xornadas de 24 horas, sete días á semana e cun salario de entre 700 e 800 euros, polo que reclaman unha negociación para estudar, entre outras cuestións, compensacións por traballar en días festivos.

Así mesmo, segundo a CIG, requiren un abono polos "danos e prexuízos" ocasionados pola citada modificación das súas condicións laborais, ademais dunha compensación por vía económica ou en días libres polos festivos traballados, e aínda maior no caso dos "festivos especiais" (24, 25 e 31 de decembro e 1 e 6 de xaneiro).