As terceiras eleccións xerais non mudarían nada no Congreso e En Marea estancaríase nos 5 deputados
Unha enquisa de Celeste-Tel outorga practicamente os mesmos escanos a todas as forzas políticas con representación nas Cortes.
- Dúas novas enquisas dan maioría absoluta a Feijóo e meten a Ciudadanos no Parlamento
- A suma de En Marea, PSdeG e BNG permitiría un goberno progresista, segundo Sondaxe
Por Galicia Confidencial | Madrid | 30/08/2016 | Actualizada ás 14:43
España semella atrapada nun bucle. A convocatoria de terceiras eleccións serían unha perda de tempo e un novo custe de millóns de euros, ademais de manter paralizado o Estado por máis tempo. Malia que as principais forzas políticas están xogando cadansúa estratexia, co ollo posto nunha nova convocatoria e o outro no debate de investidura de Mariano Rajoy, o certo é que desta vez as mudanzas serían aínda menos significativas que nos últimos comicios respecto aos de decembro. A paisaxe do Congreso non mudaría nada, con practicamente o mesmo número de deputados para as mesmas forzas políticas que conseguiron representación o pasado 26 de xuño. Así, nada se movería e España seguiría atrapada na inmobilidade. Así o reflicte unha nova enquisa feita por Celeste-Tel, que outorga a todos os partidos o mesmo número de escanos que xa teñen, incluída En Marea, que se mantería cos cinco actuais, incapaz de recuperar os sexto escano acadado nos comicios de decembro de 2015.
Segundo a sondaxe, elaborada para eldiario.es, o PP volvería gañar as eleccións. Porén, contra os augurios dos que falan dunha maioría absoluta dos conservadores no caso de repetirse por teceira vez as eleccións, os populares practicamente repetirían o último resultado, acadando 139-141 deputados, fronte aos 137 actuais.
Do lado da dereita, a Ciudadanos non lle pasaría factura o pacto co PP, xa que tamén repetiría practicamente o mesmo resultado, con 30-31 deputados (actualemnte ten 32).
O "non é non" do PSOE a un goberno do PP tampouco lle pasaría factura aos socialistas, pero tampouco lles beneficiaría. Os de Pedro Sánchez volverían repetir resultado, con 83-86 escanos (actualmente teñen 84).
Tampouco funcionaría a estratexia de Podemos e Izquierda Unida —coaligados en Unidos Podemos—, que seguirían moi lonxe do ansiado sorpasso. Os podemitas, xunto cos de Alberto Garzón, non serían quen de avanzar e lograrían 43-45 escanos (nos últimos comicios obtiveron 45 deputados).
Do lado do grupo de Unidos Podemos, que conseguiu fagocitar a En Marea e En Comú Podem, máis do mesmo: a coalición galega volvería repetir os cinco escanos que xa ten (un menos que nos comicios de 2015) e os cataláns acadarían 11-12 (agora teñen 12). O resultado desta enquisa para En Marea podería ser un indicio do que suceda o próximo 25 de setembro nas eleccións galegas. Se ben a enquisa de Sondaxe lles outorga unha suba que os levaría a ser a segunda forza en Galicia, outras enquisas sitúan ás mareas por debaixo dos socialistas en Galicia, incapaces de crecer e de facer realidade o sorpasso.
O resto de formacións que completan o Congreso dos Deputados repetirían os mesmos resultados e España seguriía sumida no bucle no que semella atrapada.
