UGT Pontevedra pide aos concellos que non autoricen as terrazas dos hostaleiros con denuncias laborais

O sindicato UGT pediu aos Concellos e á Deputación de Pontevedra que adopten unha postura "contundente" con aquelas empresas do sector turístico que teñan denuncias por incumprimento de contrato laboral e que non autoricen a montaxe de terrazas aos hostaleiros nesta situación.

O secretario de UGT Pontevedra-Arousa, José Ramón Vidal e o delegado da Federación de Comercio deste sindicato, Carlos Esperón, indicaron que se incrementaron as contratacións durante este verán en empresas de hostalaría e, en xeral, no sector terciario, pero tamén apuntan que "aumentaron as irregularidades" nos pagamentos".

Ante esta situación, dende o sindicato reclámase que os concellos non autoricen a instalación de veladores ou deixen de conceder beneficios a aqueles establecementos nos que existan denuncias. Entenden que todas as administracións deben actuar para evitar unha situación de "competencia desleal" que se está a rexistrar no sector, segundo Vidal e Esperón, xa que coinciden establecementos que non realizan contratacións correctas con outros que si.

José Ramón Vidal recordou que mantiveron a principios do verán un encontro co xefe da Inspección de Traballo en Pontevedra para trasladarlle a preocupación por este tema. Dende a Inspección recoñeceron o problema e sinalaron que porían en marcha un programa de control que, non obstante, "non está a obter resultados", segundo este sindicato, "por carencia de medios".

Afirman que o perfil do traballador que se atopa nunha situación de non pagamento de todo o salario establecido no convenio do sector hostaleiro é o de "muller nova con nóminas de 700 euros", cando terían que estar a cobrar 1.000 euros polo tempo que excede da súa xornada laboral.

CONDICIÓNS INFERIORES

No 90 por cento dos casos indican que os traballadores chegan ao sindicato despois de asinar a liquidación sen ser conscientes de aceptar unha cantidade económica inferior á que lles corresponde nas que, segundo os representantes sindicais, "non adoitan aboalos as vacacións ou as horas extra".

Vidal sinalou que moitos dos profesionais da hostalaría formados en centros como o Carlos Oroza de Pontevedra deciden emigrar ante a situación empresarial que se vive en Galicia e reclamou unha intervención por parte das distintas administracións para limitar estes abusos por parte dos empresarios.