Rivera ofrécelle a Feijóo un pacto se o PPdeG perde a maioría absoluta
O líder de Ciudadanos cre que a súa formación pode ser a "chave" dun "goberno estable" de Feijóo e critica o "batiburrillo" de En Marea.
Por Europa Press / Redacción | A Coruña | 04/09/2016 | Actualizada ás 14:29
A pasada semana foi Mariano Rajoy, secretario xeral do PP, e esta fin de semana foron Pedro Sánchez, líder do PSOE, e Albert Rivera, o presidente de Ciudadanos. Os líderes dos partidos estatais comezan a poñer a Galicia no punto de mira político ante a delicada situación política que vive o Estado.
Se o sábado Sánchez dicía que era o PSdeG o partido con posibilidades de gobernar a Xunta, este domingo Rivera amosouse convencido de que C's será a "chave do goberno" de Feijóo se os populares perden a súa maioría absoluta.
O presidente de Ciudadanos considera que hai dúas opcións o próximo 25 de setembro: que o Partido Popular gañe con maioría absoluta en Galicia, o que suporía un "descontrol" e unha "falta de reformas", ou que a perda. Se esta última posibilidade sucede, sinalou, preséntanse dous camiños: un "batiburrillo" representado, na súa opinión, pola confluencia En Marea ou, polo contrario, a posibilidade de configurar un "goberno estable" para o que a súa formación sexa a "chave".
Rivera lanzou esta mensaxe nun acto celebrado polo seu partido na Coruña, onde arroupou á candidata á Presidencia da Xunta, Cristina Losada, a só cinco días do inicio da campaña electoral en Galicia. E é que asegurou que Ciudadanos posibilitaría "reformas" e controlaría ao Partido Popular de Alberto Núñez Feijóo desde o Parlamento galego para que "non faga o que lle da gana".
"Creo que sería bo para Galicia", opinou, para logo poñer como exemplo a Comunidade de Madrid, onde o seu partido, defendeu, controla ao Partido Popular de Cristina Cifuentes e "marca a axenda".
