E que robot aspirador me compro?
Os robots aspiradores son o último trebello na tecnoloxía doméstica que logrou afianzarse nos fogares. Hai poucos anos eran unha rareza propia das casas máis acomodadas e dos fanáticos da tecnoloxía. Pasoulles o mesmo que aos lavalouzas. Dunha rareza pasaron a ser unha ferramenta común -e para algúns imprescindíbel- en moitísimos fogares dispostos a pagar unha media duns 300/400 euros por aforrar o tempo de pasar a vasoira.
Por Galicia Confidencial | Santiago de Compostela | 06/09/2016 | Actualizada ás 13:02
Como era de agardar, a popularización destes trebellos veu acompañada dunha multiplicación exponencial da oferta e das gamas. Tal diversidade de prestacións de robots aspiradores vese loxicamente reflexada en prezos moi diferentes. A media pode andar nos 300/400 euros, pero hainos dende pouco menos de 100 euros até máis de 800 euros. Para axudarnos a escoller a máquina que máis nos convén e aforrar tempo, unha boa idea é informarnos nalgún dos portais, como Aspirame, que se adican especificamente a comparar os diferentes modelos de robots aspiradores.
En todo caso, debemos ter en conta factores chave como a batería. Se imos usar o robot a diario ou cada poucos días, debemos desbotar as gamas máis baixas. As baterías seguen a ser o principal problema dos robots baratos. Dunha máquina de prezo estándar podemos agardar que polo menos faga o seu traballo sen problemas durante os dous anos de garantía legal. Cunha máquina barateira podemos atoparnos que aos poucos meses non é capaz de limpar toda a casa sen que quede sen enerxía.
Outro punto a considerar é a programabilidade. Para sacarlle rendemento, é importante que se poida configurar a máquina para que limpe regularmente e, asemade, sexa capaz de aceptar ordes concretas; por exemplo cando sucede algún ‘cataclismo’ na cociña. Os robots máis avanzados mesmo son capaces de aprender que zonas están habitualmente máis sucias e centrarse na súa limpeza, incluso de evitar certas pezas da casa.
A autonomía non a dá só a batería, tamén a proporciona a capacidade do depósito de lixo. Menos de 0,3 litros non é recomendábel, sobre todo para aquelas casas nas que viven mascotas con pelo.
Tamén cómpre abordar a sempre ambivalente cuestión da marca e o prezo. Unha marca coñecida e cara non ten porque garantirnos un bo produto. Agora ben, o que si nos debe garantir é, polo menos en teoría, unha aceptable oferta de recambios para baterías, depósitos, etc. Polo tanto, se compramos un robot de gama alta -do que agardamos que funcione moitos anos- debemos fuxir das marcas descoñecidas, porque posiblemente acabemos tendo problemas para atopar recambios.
