Renfe e Fomento activan o plan de asistencia ás vítimas do accidente no Porriño

O teléfono para os afectados é o 900 101 020.

Por E.P. | Porriño | 09/09/2016 | Actualizada ás 12:21

Comparte esta noticia

Renfe e o Ministerio de Fomento activaron o Plan de Asistencia a Vítimas de Accidentes Ferroviarios e os seus Familiares (PAVAF) tras o sinistro do Porriño (Pontevedra), no que faleceron, polo menos, catro persoas, entre elas o maquinista do convoi.

Traslado de feridos no tren descarrilado en Porriño
Traslado de feridos no tren descarrilado en Porriño | Fonte: vigoalminuto

Segundo informou Renfe, o tren afectado, que cubría a ruta Vigo-Oporto, saíu da cidade galega ás 9,02 horas. Pouco despois, ás 9,25 horas, descarrilou á altura do Porriño con 65 persoas a bordo (63 viaxeiros, o maquinista e o interventor).

O servizo Vigo-Oporto, chamado Tren Celta, préstase de forma combinada entre Renfe e a empresa ferroviaria portuguesa Comboios de Portugal. O tren accidentado e o maquinista a bordo son portugueses.

Renfe precisou que cada día circulan dous trens internacionais por sentido neste percorrido (Tren Celta). Ademais, nese tramo circulan trens de Longa e Media Distancia de Renfe. O servizo atópase interrompido entre Ourense e Redondela.

No lugar do sinistro atópanse mobilizados os servizos sanitarios, bombeiros e persoal de mantemento de Infraestructura e Integria.

Pola súa banda, Adif abriu unha investigación para determinar as causas do accidente, segundo informou na súa conta de Twitter. O xestor de infraestruturas habilitou un teléfono para os afectados: 900 101 020.

Tanto Adif como Renfe trasladaron as súas condolencias ás vítimas do accidente e aos familiares dos afectados.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta