Por E.P. | SANTIAGO DE COMPOSTELA | 12/09/2016 | Actualizada ás 10:40
O presidente da Xunta e candidato do PPdeG á reelección, Alberto Núñez Feijóo, e a súa parella, a directora de Zara Home, Eva Cárdenas, esperan un neno, cuxo nacemento está previsto para febreiro do ano próximo.
Fontes do ámbito do líder popular confirmaron a Europa Press a noticia, que publica este luns 'La Voz de Galicia' e que, ata o momento, só coñecían os seus achegados máis próximos. Unha noticia que se coñece a dúas semanas dos comicios e que pode influír positivamente na imaxe do candidato popular.
Feijóo, agora inmerso na campaña electoral para os comicios do 25 de setembro, nos que intentará revalidar a súa maioría absoluta por terceira vez, estrearase na paternidade con 55 anos, que cumpriu o pasado sábado. A súa parella, de 51, xa ten unha filla.
Definido nalgúns medios como un dos 'solteiros de ouro' do PP, o presidente chegou a afirmar que o matrimonio lle parecía "unha institución moi pouco democrática". Pero, aínda que o gardaba para a súa intimidade, Feijóo si quería ser pai.
De feito, no seu ámbito aseguran que está moi feliz. O pasado sábado chegou a dicir que este 2016 era o ano das peores noticias (perdeu o seu pai recentemente) e tamén o das "mellores", aínda que non concretou máis.
A noticia tamén cumpre un desexo da nai do presidente, quen na campaña galega de 2009, nun dos vídeos difundidos polo partido, o desvelaba: "Di que casou con Galicia. Vaia, home... E Galicia non me dá netos".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.