Por Galicia Confidencial | Santiago de Compostela | 14/09/2016 | Actualizada ás 12:54
'As pedras de San Lourenzo' é un documental de Manuel Gago —profesor de Xornalismo na Universidade de Santiago— sobre o proxecto arqueolóxico do Castro de San Lourenzo, que dirixe Xurxo Ayán, investigador do CSIC e colaborador de GC. O documental é unha aproximación á primeira campaña que se fixo neste enclave, na parroquia de Cereixa, na Pobra do Brollón (Lugo), que comezou este verán.
Para a súa realización, Gago contou coa colaboración de Sole Felloza na fotografía, e do equipo arqueolóxico do proxecto. O guión é do propio Gago e de Xurxo Ayán.
Trátase dun documental arqueolóxico, pero "sobre todo é un documental de vidas" que "non fica no científico senón que se adentra en como o patrimonio está gravado ou vinculado aos sentimentos das persoas: ás súas vidas, ás súas esperanzas, ás súas memorias. Quen vexa 'As pedras de San Lourenzo' poderá ver como o patrimonio só ten sentido cando é vivido, cando é apropiado, cando acaba por formar parte dun. Arqueoloxía e emoción. Dous conceptos próximos. Por que non?", explica Manuel Gago no seu blog.
Os responsables do proxecto consideran o Castro d’Alende ou de San Lourenzo un ben común da Ribeira Sacra con catro valores fundamentais: un histórico, xa que o castro foi construído polos romanos para traballar as importantes explotacións auríferas e férreas da zona e dominar as comunicacións; outro patrimonial, pois no contexto da candidatura a Patrimonio da Humanidade da Ribeira Sacra, o castro demostra a capacidade da sociedade civil por apostar polo patrimonio cultural; por outro medioambiental, xa que con este proxecto se pretende recuperar unha lagoa xenerada a partir das canteiras do século XX e hoxe convertida en refuxio de aves migratorias, e por último, turístico, pois o Camiño de Inverno a Compostela pasa a rentes do castro, polo que os responsables do proxecto buscan crear un recurso de primeiro valor para un importante itinerario turístico.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.