Un erro na distribución de papeletas de En Marea na Coruña obriga ás mesas a decidir sobre a súa validez
A Xunta Electoral de Galicia di que "non é válido" computar como votos válidos estas papeletas, pero apunta que a decisión final é das mesas.
Por E.P. | SANTIAGO DE COMPOSTELA | 25/09/2016 | Actualizada ás 13:09
Un erro da empresa encargada de distribuír a publicidade electoral e as papeletas de En Marea na zona de Ribeira (A Coruña) obrigará este 25S ás mesas electorais a pronunciarse sobre a validez dos votos que se emitan para esta formación en A Coruña empregando a papeleta correspondente á provincia de Pontevedra.
En concreto, o erro afecta a unhas 1.000 papeletas que se enviaron como parte do 'mailing' electoral á zona de Ribeira. Por un erro "moi localizado", electores da provincia de A Coruña recibiron equivocadamente no seu domicilio a papeleta correspondente a En Marea pola provincia de Pontevedra.
Tras a advertencia do erro realizada polo partido á Xunta Electoral de Galicia, este organismo remitiu na mañá deste domingo un escrito á Xunta Electoral da Coruña, que foi trasladado ás mesas da provincia.
Neste documento especifícase que non é posible, como se reclamaba, "computar como votos válidos" os emitidos con papeletas correspondentes a outra provincia de forma xeral, dado que "no colexio electoral debe haber papeletas válidas de todas as forzas políticas" para que o elector "escolla a desexada", o que "salvagarda" os seus dereitos.
Non obstante, recorda que "a competencia para declarar a validez dos votos" escrutados "correspóndelle ás mesas", segundo o establecido na Lei Orgánica do Réxime Electoral Xeral.
En Marea advertiu nas súas redes sociais aos electores de A Coruña deste erro e pediron aos que leven a súa papeleta de casa que a "revisen ben", dado que pode xerar "problemas no reconto". "Se tes dúbidas, o mellor é coller a papeleta directamente no colexio electoral", indican na súa conta de Twitter.
