O sector volve marcar marca de contratación en Galicia e supera os 81.400 traballadores

O sector turístico galego rexistrou este verán a cifra máis alta de toda a serie histórica, cun número medio de afiliados durante os meses estivais de 81.472 traballadores, un 2,5% máis que un ano atrás e un 12,1% máis respecto a 2008.

Así o recolle un informe que elaborou a empresa Randstad con motivo do día internacional do turismo, que se celebra o 27 de setembro. Para iso, tivo en conta os datos publicados polo Ministerio de Industria Enerxía e Turismo, correspondentes aos meses de verán (xuño, xullo e agosto) de 2008 a 2016.

Galicia encadea así tres anos de crecemento constante neste colectivo de traballadores. Durante xullo de 2016, o número de traballadores neste sector na comunidade alcanzou unha nova marca, 84.967 afiliados.

No conxunto estatal, o sector turístico alcanzou os 1.668.800 afiliados de media. Isto supón un incremento do 5,3% respecto a 2015, e do 16,1% respecto a 2008. Concretamente, o sétimo mes do ano, o número de traballadores neste sector alcanzou unha nova marca, 1.719.622 afiliados, a cifra máis elevada da historia en España.

"A diversidade xeográfica de España, a grande oferta de ocio, a boa calidade das infraestruturas turísticas e o contexto internacional, sobre todo no Mediterráneo, posicionaron a España como un dos destinos favoritos, o que está a beneficiar ao mercado laboral", explica Valentín Bote, director de Randstad Research.

TODAS AS CC.AA. CRECEN

Durante os tres meses de verán de 2016, todas as autonomías creceron respecto a 2015, aínda que con diferentes variacións, que van dende o 8,4% ao 1,9%.

A análise elaborada por Randstad destaca que os dous arquipélagos, Canarias (8,4%) e Baleares (7,3%), e dous das principais destinos vacacionales, Comunitat Valenciana (6,2%) e Andalucía (6,2%), son as que impulsaron o crecemento da contratación no sector turístico. Ségueos Madrid (5,4%), que tamén se sitúa por enriba da media (5,3%).

Por outra banda, Catalunya, Navarra, Cantabria, Euskadi, Castilla-La Mancha, Murcia e Aragón experimentan crecementos superiores ao 3%, pero por debaixo da media.

As últimas posicións do ranking ocúpanas Extremadura, La Rioja, Castilla e León, Galicia e Asturias, todas elas entre o 1,9% e o 2,5%.

En termos absolutos, Cataluña e Andalucía son as comunidades autónomas que teñen máis afiliados, con 286.837 e 276.734 traballadores, respectivamente, seguidas de Madrid (195.950) e Comunitat Valenciana (173.100).

Estas catro acumulan o 55,9% do total de profesionais que traballan no sector durante o verán. No lado oposto, Navarra e La Rioja son as que teñen menos ocupados, con 9.658 e 17.062 respectivamente. A climatoloxía, a posición xeográfica e a oferta de ocio e restauración das rexións inflúen de xeito directo no mercado laboral do sector turístico.