Euskaltel, dona de R, alcanza un acordo con Telxius para utilizar as súas 11.000 torres de telecomunicacións

O Grupo Euskaltel -Euskaltel e a galega R Cable, que adquiriu o pasado ano- e Telxius alcanzaron un acordo que permitirá á operadora do norte de España utilizar as case 11.000 localizacións de telecomunicacións coas que conta a filial de infraestruturas de Telefónica no país.

Segundo informan nun comunicado conxunto, Euskaltel xa asumiu un compromiso de utilizar un mínimo de 100 torres de Telxius como primeira manifestación do acordo alcanzado entre ambas as dúas compañías.

Euskaltel remarca que este acordo lle permitirá incrementar "substancialmente" as potenciais localizacións cos que ampliar o alcance da súa propia rede móbil 4G e utilizar estas instalacións para telefonía móbil, solucións de acceso inarámicas en ámbitos rurais e solucións de acceso específicas para empresas.

O conselleiro delegado de Euskaltel, Francisco Arteche, remarcou que alcanzar un acordo cunha empresa co potencial de Telxius é "un gran paso" na súa estratexia de apostar polo desenvolvemento da rede propia e por ter alianzas tecnolóxicas con compañías internacionais líderes no sector.

"Este acordo vai máis alá dun acordo de localizacións e recolle unha alianza de vontade de colaboracións conxuntas, que nos reforza na nosa estratexia de creación de valor para a nosa sociedade, os nosos clientes e os nosos accionistas," agregou.

Pola súa banda, o conselleiro delegado de Telxius, Alberto Horcajo, mostrouse moi satisfeito de alcanzar un acordo con Euskaltel, "un referente das telecomunicacións no Norte de España".

"O acordo constitúe un paso moi importante na consolidación, desenvolvemento e optimización das nosas capacidades de servizo no negocio de torres, e esperamos, ademais, encontrar novas oportunidades que nos permitirán seguir potenciando o noso liderado como empresa de infraestruturas," engadiu.