Santos Héctor insta a Leiceaga e a Cancela a que "asuman responsabilidades", pero evita pedir a súa dimisión

O secretario provincial do PSdeG-PSOE en Pontevedra, Santos Héctor Rodríguez, compareceu este martes en rolda de prensa para reiterar as súas críticas ao candidato socialista á Presidencia da Xunta, Xoaquín Fernández Leiceaga, e á presidenta da xunta xestora do partido en Galicia, Pilar Cancela.

Así, aínda que evitou pedir a súa dimisión, apelou a que sexan eles mesmos os que tomen as medidas que consideran oportunas tendo en conta "a lóxica política nestas situacións".

Ao respecto, Santos Héctor destacou o "fracaso estrepitoso" do seu partido nas eleccións autonómicas do pasado domingo, polo que cre que é necesario que os responsables da campaña electoral "asuman responsabilidades".

O secretario provincial pontevedrés recordou que o peor resultado ata agora do PSdeG nunhas eleccións autonómicas o tivera o actual alcalde de Vigo, Abel Caballero, o cal dimitiu tras iso. Tamén se referiu ao caso do expresidente da Xunta, Emilio Pérez Touriño, que dimitiu tras perder o goberno no ano 2009, a pesar de que el non perdeu catro deputados como pasou nesta cita electoral, senón que repetira resultados con 25 escanos.

CRÍTICO COA XESTORA E CANCELA

Santos Héctor entende que "eles saberán como teñen que asumir esas responsabilidades", aínda que puntualiza que a reacción que tivo a presidenta da xestora tras os resultados foi equivocada, pois "nin fixo autocrítica nin sequera análise dos resultados" e "aínda se atreven a buscar responsables fóra".

O secretario provincial do PSdeG-PSOE en Pontevedra foi especialmente crítico con Pilar Cancela porque "non deu explicacións" a un "feito gravísimo", o cal "non se pode deixar pasar dese modo". Tamén cuestionou que "aqueles que foron a Madrid de forma apresurada a cambiar as listas aprobadas no comité provincial agora permanecen calados e escondidos".

"É un escándalo político que non estean a falar claro e que estean a escorrer o vulto", censurou, ao tempo que negou calquera responsabilidade do partido en Pontevedra no resultado electoral.

Fronte aos que atribúen parte do fracaso nas urnas ao "ruído" que se fixo dende a agrupación de Vigo, Santos Héctor replica: "Nós non fixemos ningún ruído". "Foron eles coas súas decisións", botou en cara ao actual equipo á fronte do PSdeG.

Así mesmo, esgrimiu os resultados electorais en Vigo, onde o PP tivo o 34% dos votos fronte ao 42% de sitios como Pontevedra, cifras que, ao seu xuízo, significa que "se esa porcentaxe se dese en toda Galicia, hoxe Feijóo non gobernaba".