Galicia promove en Francia a náutica recreativa a través da feira Grand Pavois

Turismo e Portos de Galicia promoverán o turismo náutico na Comunidade na feira especializada Grand Pavois, que terá lugar na cidade francesa de La Rochelle dende este mércores e ata o 3 de outubro.

Segundo apuntou a Xunta a través dun comunicado, esta é a cuarta edición consecutiva na que Turismo de Galicia participa nesta feira.

O obxectivo é dar a coñecer as instalacións náutico-deportivas e recreativas da Comunidade, así como os servizos, produtos e recursos do turismo náutico galego, co fin de atraer navegantes do norte de Francia ao litoral galego.

Organizada por primeira vez en 1973, a feira Grand Pavois celebra este ano a súa edición número 43. Con 100.000 metros cadrados de exposición, conta con máis de 800 expositores internacionais, que representan a 35 países de todo o mundo.