VIGO | 28/09/2016 | Actualizada ás 20:35 por EUROPA PRESS
O comité executivo do Consorcio da Zona Franca de Vigo acordou este mércores investir máis de 4,7 millóns de euros en varias obras nos polígonos de Bouzas e de Balaídos, así como nun proxecto de mellora urbanística da área de Bouzas.
No relativo a Balaídos, o comité adxudicou á empresa Elinsa por 1,43 millóns de euros a realización das obras da subestación eléctrica, que mellorará tanto a eficiencia enerxética no polígono como a tensión na planta de GKN; e acordou licitar por 2,045 millóns a mellora das instalacións contraincendios e cubertas en dúas naves propiedade do Consorcio.
Así mesmo, no que respecta a Bouzas, foron adxudicados á empresa Hidro Miño S.L. por 1,2 millóns as obras de rehabilitación das cubertas do edificio de oficinas e de dúas naves dedicadas á almacenaxe e distribución de mercadorías.
Finalmente, acordouse convocar por 150.000 euros un concurso para redactar o proxecto de mellora urbanística da área de Bouzas, co fin de, entre outras cuestións, mellorar o benestar dos usuarios, aumentar o aforro enerxético, mellorar e reordenar a circulación, colocar nova sinalización, permeabilizar as superficies, e minimizar os residuos e a contaminación.
En relación á comisión mixta proposta polo Concello de Vigo para estudar a mellor forma de levar adiante a rehabilitación da Panificadora, por maioría do comité executivo foron designados como representantes de Zona Franca a directora de Promoción Económica, o director de Obras, o vogal do Estado Elena Muñoz e o secretario xeral do Consorcio.
"Non considerou conveniente" o comité, en cambio, formar unha comisión paritaria entre a Zona Franca e o Concello para tratar as ampliacións do Parque Tecnolóxico e de Balaídos, "dado que en ambos os dous polígonos o promotor é o propio Consorcio e a tramitación se realiza ante a Xunta a través de proxectos sectoriais supramunicipais". Non obstante, non descarta a súa conformación se durante a tramitación "fose necesario".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.