Oito de cada dez concellos galegos empregan software libre

O 82,6 por cento dos concellos galegos dispón de software libre no seu equipamento informático, ben en ordenadores de usuario ou servidores, rexistrando un incremento de 3,1 puntos porcentuais no último ano.

Concretamente, o 77,1 por cento dos concellos galegos contan con software libre nos equipos informáticos de usuario e o 47,3 por cento dos concellos contan con software libre nos seus servidores.

Son datos do último informe sobre o software libre nos concellos de Galicia, con período de referencia o último trimestre do ano 2015, que publica o OSIMGA, dependente da Axencia para a Modernización Tecnolóxica de Galicia (Amtega).