A Xunta precisa que certos contratos de publicidade institucional dependen de acordos marco

A Secretaría Xeral de Medios acaba de contratar unha campaña para a elaboración, produción e plan de medios da campaña do 4 de outubro e Día internacional dos animais. Un concurso que gañou o Grupo de Empresas de Comunicación Marketing e Investigación S.A. por 67.000 euros –Sen IVE-- e que se realizou co goberno da Xunta en funcións.

Sen embargo, este departamento informa que esta contratación forma parte do “Acordo marco dos servizos de elaboración, produción e plan de medios de campañas institucionais da Xunta de Galicia en datas relevantes para a Comunidade Autónoma, dos anos 2015 e 2016”. Polo tanto, apunta que está exento das recomendacións dadas pola Asesoría Xurídica da Xunta para que non haxa licitacións durante a época na que o executivo está en funcións.

Este acordo, de 1,75 millóns de euros, ten por finalidade a elaboración e execución de campañas de publicidade e de comunicación nos anos 2015 e 2016 coa elaboración dun plan de medios, que inclúa as distintas campañas, e a elaboración, produción e execución desas campañas. Este convenio marco tamén recolle que, “tendo en conta o período de duración do contrato e despendendo das necesidades de difusión e comunicación, está prevista a realización de distintas campañas de publicidade e comunicación”.

Deste xeito contrataranse “campañas principais” --17 de maio, Día das Letras Galegas e 25 de xullo, Día de Galicia-- e outras campañas “menores sobre datas sinaladas e de alcance institucional a definir pola administración”, que é no que se incluiría o concurso que a Secretaría Xeral de Medios acaba de licitar estes días.

Este departamento tamén precisa no prego de condicións que estas campañas “teñen carácter estimativo e non vinculante” e, polo tanto, non existe a obriga de contratación dun número determinado de campañas, nin está establecido o importe de cada unha delas.

Sen embargo, non acontece así con outras campañas de publicidade institucional aprobadas estes días, co goberno da Xunta en funcións, e que sumán máis de 1,1 millóns de euros, entre elas, unha de 365.216 euros –sen IVE-- de Turismo de Galicia para a elaboración, produción e plan de medios da campaña de promoción dos recursos naturais e culturais de Galicia durante 2016, adxudicado xa a Proximia Havas.