Un busto de Fraga pode rematar na Fiscalía por incumprir a Lei da Memoria Histórica

A figura de Fraga segue xerando polémica. Desta volta é no Senado, onde o ex presidente galego e ex ministro franquista rematou a súa vida política. Unha proposta de Compromís para retirar un busto que se colocou á entrada do Salón de Plenos en xaneiro de 2013 , acabou nun cruce de acusacións.

Compromís recorda non obstante que tamén foi ministro na ditadura de Franco e considérao un "personaxe abxecto". O seu voceiro, Carles Mulet, criticou este martes que a Mesa do Senado denegou a súa petición sen darlles explicacións e anunciou que estudan levar o caso á Fiscalía por incumprimento da Lei de Memoria Histórica no Senado, por exhibir unha homenaxe a quen consideran representante do Franquismo.

"É non coñecer a historia, intentar buscar o frentismo,", respondeu o vicepresidente desta Cámara, Pedro Sanz, preguntado ao respecto. Explicou que o busto foi colocado nese corredor do Senado por acordo de todos os grupos e que Fraga é "unha figura histórica" e representante "do devir do país".

"Participou na Constitución Española e isto é un insulto e unha falta de delicadeza e de respecto cara á súa persoa, ao Senado, ao Grupo Parlamentario e ao partido. Non é bo volver buscar o enfrontamento persoal duns contra outros", engadiu, e advertiu a Compromís que non pode "dar leccións de nada" aos demais. "Defectos temos todos", concluíu.

O busto de Fraga quedou exposto no Senado o 15 de xaneiro de 2013, cando se cumpría o primeiro aniversario da súa morte e por acordo unánime da Mesa da Cámara. A iniciativa partiu do PP, que asumiu o custo da obra e a doou á institución. Para Compromís, non obstante, a presenza desta figura na zona de paso habitual de senadores e visitas é "unha afronta e un insulto a todas as persoas asasinadas ou represaliadas polo goberno do cal formou parte".