Por gcdeportes | Vigo | 16/10/2016 | Actualizada ás 23:54
Ficha técnica
Vilarreal 5: Asenjo; Mario, Álvaro González, Víctor Ruiz, Jaume Costa; Bruno, Trigueros, Roberto Soriano (Rodri, 81), Samu Castillejo; Sansone (Pato, 73’) e Bakambu (Jonathan dos Santos, 63’).
Celta 0: Sergio Álvarez; Hugo Mallo, Cabral, Sergi Gómez, Jonny; Daniel Wass (Josep Señé, 72’), Radoja, Orellana; Pione Sisto (Pape Cheikh, 52’), Theo Bongonda e Iago Aspas (Giuseppe Rossi, 57’).
Goles: 1-0: Roberto Soriano (minuto 8). 2-0: Roberto Soriano (11’). 3-0: Bakambu (37’). 4-0: Wass, en propia meta (48’). 5-0: Trigueros (92’).
Árbitro: Estrada Fernández (catalán), Expulsou por dobre cartón a Sergi Gómez no minuto 86. Amarelas a Iago Aspas, Orellana, Pape Cheikh e Daniel Wass nos celestes e a Álvaro González nos locais.
Incidencias: partido da 8ª xornada de Liga no Madrigal ante 18.152 espectadores.
Quince días despois de gañar ao Barça, partido para esquecer axiña do Celta, que encaixou dous goles tras dous erros nos primeiros minutos e non deu sinais de vida no resto do partido. Un verdadeiro suplicio para o Celta no Madrigal, onde acabou encaixando cinco goles. Un equipo descoñecido, sen intensidade, nun dos peores encontros dende que o Toto Berizzo senta no banco celeste. Cuarta derrota en oito xornadas, e 16 goles encaixados, a dous por encontro.
Os dous primeiros disparos a porta do Vilarreal foron gol. O primeiro, no minuto 8, nun erro na marcaxe de Hugo Mallo: pase de Trigueros para Roberto Soriano ás costas do capitán e primeiro gol para os castellonencos. Tres minutos despois, erro de Sergio Álvaréz na saída de balón e segundo gol do italiano Soriano por riba do meta de Catoira.
Co 2-0, os locais baixaron un chisco o ritmo e permitiron ao equipo de Berizzo ter máis balón e achegarse á área, pero sen crear verdadeiro perigo. A presenza celeste en campo contrario creaba máis espazos, e así chegou o terceiro, nunha contra levada por Sansone e finiquitada con precisiónm por Bakambu. 3-0 ao descanso.
E para rematar o despropósito, nada máis comezar o segundo tempo, na primeira chegada local, gol en propia meta de Daniel Wass tras un saque dende o recanto. Quedaban corenta minutos de suplicio celeste. E menos mal que o Vilarreal baixou a intensidade e conformouse co 4-0. Nada destacábel no Celta, que malia o dominio non creou ningunha xogada de perigo. Entraron Pape Cheikh, Giussepe Rossi e Josep Señé, pero nada mudou. Sergi Gómez autoexpulsouse e no tempo engadido, contra de Mario Gaspar, que acabou cun remate de Pato ao pau e Trigueros aproveitou o rexeite para marcar o 5-0.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.