SANTIAGO DE COMPOSTELA | 21/10/2016 | Actualizada ás 13:40 por EUROPA PRESS
O voceiro parlamentario de En Marea, Luís Villares, reivindicou este venres que a súa formación actuará na Cámara como "garantía" da defensa dos dereitos e liberdades dos galegos que o PPdeG "pretende seguir recortando".
Díxoo aos xornalistas nos corredores do Pazo do Hórreo ao termo da sesión constitutiva do Parlamento, sen deixar de facer fincapé na mensaxe que tamén sacou a colación na súa aceptación do cargo de deputado: "o dereito" dos galegos "a ser un pouco máis felices nun país xusto".
Nesa liña de defender os cidadáns, avanzou a presentación de iniciativas en defensa dos traballadores, de "intereses nacionais estratéxicos" como o traspaso da AP-9 e da loita contra a corrupción dotando de "máis medios" aos xulgados.
Así mesmo, Villares anunciou actuacións en favor de que as interrupcións do embarazo se fagan dentro do territorio galego, a raíz dunha sentenza que condena ao Sergas a pagar a unha muller que acabou perdendo o útero; e peticións de derrogación do decreto que regula o uso do galego no ensino, pois lle outorga, ao seu xuízo, a consideración de "lingua de segunda".
Cuestionado sobre as queixas do seu grupo pola falta de espazo, dixo que levará á "primeira" xunta de voceiros que En Marea require unhas instalacións "acordes" coa dimensión do seu grupo parlamentario. "Pero seguro que atoparemos espazo no Hórreo", chanceou.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.